Ayub 13

13:1 "Yangasenna anjo le'baki kulangngere' siagang kucini' kalengku, siagang kupahang tojeng-tojeng.
13:2 Apa nuassenga, kuasseng tonji; gassingka nukana nubeta'.
13:3 Mingka erokka' a'bicara siagang Kaminang Koasaya; erokka' ampattojengi parkaraku ri dallekanNa Allata'ala.
13:4 Saba' nutongko' ngasengi katoloannu siagang balle-balle, tena sisalana sanro paballe-ballea.
13:5 Ebara' angkana tena ngasenja nu'bicara, akkulle nikanajako tau cara'de'.
13:6 Jari pilangngerimi pappialingku; parhatikangi kana mappatojengku.
13:7 Akkullekai lanri Allata'ala, nu'balle-balle? Akkullekoka a'balle-balle untu' kaparalluanNa?
13:8 Akkullekoka agang mae ri Allata'ala nanualle-alleang salaku tumappatojenna?
13:9 Punna Naparessako Allata'ala, maka labajiki kajarianna? Maka akkulleko antipui sangkamma nutipuna rupataua?
13:10 Punna nia' nualleangang, manna nucokko-cokko, lanihukkung terasakko ri Allata'ala.
13:11 Apaka tena nata'bangka nyawanu ri kalompoanNa Allata'ala? Apaka tena napakamallaki nyawanu ri kahebakkanNa?
13:12 Sikontu pappasailenu sanrapangi limbu'bu' tenaya matu-matunna; alasannu sanrapangi butta pi' gampanga atte'ngere'.
13:13 Lanri kammana anjo, a'mereki mako, boli'mi kamma nainakke a'bicara! Takujampangiai manna pole apa kale'bakkanna!
13:14 Sadiama' ansaungi nyawaku!
13:15 Tena kujampangi lanri tappu' minasama'! Punna ero' Allata'ala ambunoa', kupassareang mami kalengku, mingka kupattojengi panggaukangku ri dallekanNa.
13:16 Gassingka lanri anjo kabaraniangku nakusalama', saba' tau ja'dalaka tena nabarani andallekang ri Allata'ala!
13:17 Kamma-kamma anne pilangngeri baji'-baji' kanangku; parhatikangi apa kupakasingaraka.
13:18 Sadiama' ampamajui parkaraku; tappaka', angkana tena kukkulle nisalakang!
13:19 O, Batara, punna battuKi' siagang Kitudua', la'merekia' siagang kutayangi a'jalakku.
13:20 Mingka Kiturukianga' anne rua pappalakku, sollangku barani pole andallekang ri Katte:
13:21 ammari maKi' ansessa', siagang teaKi' pitujuia' kahebakkanTa!
13:22 A'bicara maKi', nakuppiali. Yareka boli'ma' kamma a'bicara, naKibalasakka' a'bicara!
13:23 Siapa jaina sala siagang dosa le'ba' kugaukang? Kipau laloi sikamma gau' sala le'baka kugaukang!
13:24 Angngapa Ki'lili siagang bella battu ri nakke? Apa saba'na naKipa'jari musua'?
13:25 Inakke poro leko' kayu runanja' niiri' ri anging numalo, angngapa naKipannekkere' kamma'! Inakke poro rarame kalotoro' siagang kalumenja' bawang, angngapa nakkulle Kiondang kamma dudua'!
13:26 Kipattantu a'jari paiki sarengku; Kibalasaki kasalang ri wattu rungkaku.
13:27 Kisikkoki rante bassi bangkengku; sikontu gio'-giokku Kijannangngi. Ba'lalo manna pala' bangkengku tena todong nata'lappasa' ri paccinitTa.
13:28 Jari a'jari lamma sikalima' sanrapang kayu jappo'; sanrapang kaeng nikanre ri alitana, a'jari jappo'ma'.