Ayub 15

15:1-3 Appialimi Elifas angkana, "Bicara kosong, Ayub, tena tojeng bua'-bua'na bicarannu. Tena tau cara'de' appiali kamma ikau anne, talanapattojengai kalenna ri kana-kana tenaya battuanna.
15:4 Ebara' nituruki anjo bicarannu, manna sitau tenamo lamalla' yareka appala' doang ri Allata'ala.
15:5 Kana-kanannu ampa'nyatai angkana salako, mingka nutongkoki kaja'dallannu siagang kaporeannu a'bicara.
15:6 Tena kuparallu antuduko siagang ansalakangko, saba' lanri kana-kanannu tonji nanituntukko.
15:7 Nukapangi angkana ikau tau uru-uru nilassukang? Apaka haderekko ri wattunna nipa'jari sikamma monconga?
15:8 Apaka nulangngereki Allata'ala ampareki rancanaNa? Apaka ikauji bawang ampatangi kacara'dekang rupataua?
15:9 Sikontu apa nuassenga, naasseng ngaseng tonji ikambe; sikontu nupahanga, napahang ngaseng tonji ikambe.
15:10 Anne kacara'dekanga natarimai ikambe battu ri tau uwanga uu'na; nia' memammi ke'nanga ri tenanapa nilassukangi manggenu!
15:11 Angngapa nakuttu nyawanu antarimai panynyaleori battua ri Allata'ala? A'bicarai ikambe siagang sa'bara' na lamma lalang arenNa.
15:12 Mingka a'jari naiki larronu, a'rinra-rinrai matannu;
15:13 larroko mae ri Allata'ala siagang nubali-bali.
15:14 Maka akkullei rupataua tena sikali salana? Akkullekai nipannaba ri dallekanNa Allata'ala?
15:15 Ba'lalo manna mae ri malaekaka tena todong Natappa' Allata'ala; tena natangkasa' ke'nanga ri paccini'Na.
15:16 Sarroangampa rupatau panraka siagang ra'masaka, angnginunga kaja'dallang sanrapang angnginung je'ne'.
15:17 Pilangngeri Ayub, nia' lakupisingariangko,
15:18 napangngajarranga tau cara'deka mae ri nakke. Anjo pangngajaranga natarimai battu ri boe-boena, nampa langka' napatulusu' mae ri turunganna.
15:19 Anjo wattua tena bansa maraeng ri pa'rasanganna ke'nanga; tena tau lampa'lingui ke'nanga battu ri Allata'ala.
15:20 Tau ja'dala' anjallakkangai paranna tau, lalussaki lalang sikontu tallasa'na.
15:21 Sa'ra-sa'ra hebaka lanreppeki tolinna; ri wattu amanga battui paellaka ambakkai.
15:22 Tena panrannuanna lakkulle alliliangi sassanga, saba' niondangi ri pa'danna pabunoa tunggala' kasampatang.
15:23 Attayangi balangkoaka ri wattu kamateanna eroki ke'nanga angkanrei maya'na. Jari angngu'rangimi angkana sassangi allo lanadallekanga.
15:24 Balaya rapangi karaeng porea, sadiami ero' ambakkai.
15:25 Kammaminjo sarenna tau ambaliai Allata'ala, siagang barania angngewai Kaminang Koasaya.
15:26-27 Tampoi ambakkai siagang angngewai Allata'ala; naangkaki pa'lapa' barambanna, tena sikali naero' nibeta.
15:28 Ammantangi ri kota-kota ancuruka, ri balla'-balla' tenaya taunna. Anjo kota-kotaya le'ba' nipattantumi untu' nipa'jari rumbangngang.
15:29 Latappela'mi kakalumanynyanganna anjo taua natenamo bate-batena; la'busu' taba sikali barang-baranna.
15:30 Tena nalakkulle ta'lappasa' battu ri sassang makkapuka; pepeka lampa'jari ammutungi cu'la'-cu'la'na. Lacappuki nitui' ri bawaNa Allata'ala.
15:31 Punna tappaki mae ri apa tenaya matu-matunna, lanitipumi; na sambe lanatarimaya, tena todong matu-matunna.
15:32 Tenapa narapiki wattunna, nalamatemo, sanrapangi tangke kayu tenayamo nakkulle lamoncongbulo poleang.
15:33 Rapang poko' anggoro' lelasa' runang rapponna, rapang poko' zaitun runtung bungana.
15:34 Tau ja'dalaka latena turunganna; la'busu' akkanre balla' nabangunga battu ri wassele' doe' pammuccu'.
15:35 Iaminjo ke'nanga anrancanga siagang anggaukangai ja'dalaka; balle-ballea tuli niaki lalang atinna."