Ayub 16

16:1-2 Mingka appialimi Ayub angkana, "A'mole-molemi kulangngere' panggappa kammaya; panynyaleorinnu poro passessaji.
16:3 Angngapapi nupammari ngasengi anjo bicara kosonnu? Apa ampakalompoi nyawanu untu' appiali?
16:4 Ebara' angkana ikau ngaseng antu inakke, nampa inakke a'jari ikau ngaseng, akkulle tonja' a'bicara kamma anjo. Kupitambungiangko bicara; lakupammenggong-menggongi ulungku.
16:5 Lakupakajarreki pa'mai'nu siagang siapa are pappitangara'; kana-kanangku lassareko panynyaleori.
16:6 Punna kua'bicara, tena nanaung pa'risikku; punna a'merekia', apa todong matu-matunna?
16:7 Namangngangngia' Allata'ala; sikontu kaluargaku Napaccappu'mi.
16:8 Nabalianga' siagang Najakkalaka'. Anne kamma roso' dudumi kalengku, na nakana taua iaminjo butti ma'nassana angkana inakke dorakama'.
16:9 Lalang larro duduNa Nakekke'-kekkeki Allata'ala tubuku; birisi' sikali ancinikia'.
16:10 Tassungke lompoi bawana taua ancau-caua'; naborongia' siagang natempa ka'rang pilisikku.
16:11 Napassareanga' Allata'ala mae ri tau dorakaya; Natu'guranga' antama' ri limanna tau kodi sipaka.
16:12 Sumpaeng amangi na salewangang tallasakku, mingka ti'ring nibakkaia' ri Allata'ala. Nata'galaki kacikorokku nampa Napatunrung ri buttaya; Napa'jaria' tampa' untu' latihang.
16:13 Tena pangngamaseanNa natulusu' inakke Napana, sa'genna assulu' parrukku.
16:14 Nabakkaia' sangkamma pejuang, Nalokokia' a'mole-mole.
16:15 Ammakea' karung tanra si'na, na kummempo ri au lanri nibeta.
16:16 Eja rupangku lanri angngarru'; akkambang na gau' tompo' matangku.
16:17 Mingka takugaukang katerassang; pammate ci'nonna pappala' doangku ri Batara.
16:18 He buttaya, teako cokkoi ri nakke kaja'dallanga; teako pammakkangngi pakkiokku appala' kaadelang.
16:19 Kuasseng Mappatojengku nia' ri suruga; a'jari sa'bi ri tenana kudoraka.
16:20 Kunicau-cau siagang nikakkali ri bela-belaku; angngarruka' andallekang ri Allata'ala appala' bantuang.
16:21 Oh, dasi-dasi na Allata'ala KalenNa ampattojenga' ri dallekanNa sanrapang tau rella ampattojengi sahaba'na.
16:22 Tenamo siapa tassesa taung-taung tallasakku; sinampe' mami ku'lampa, kutammoteramo.