Ayub 17

17:1 A'reppese'mi a'jalakku, birimmi tappu' napasakku; jerakku mami ammantang.
17:2 Napa'jaria' taua pare' tunicau-cau; tamaka batena ke'nanga ampianderia'.
17:3 Inakke tau lambusu', o Allata'ala. Kipatappaka'! Inai mami akkulle ampattojengi kana-kanangku?
17:4 Kitongkoki pikkiranna ke'nanga sa'genna tena napahangi; gassingka napadundua' ke'nanga.
17:5 Nakana paruntu' kanaya, inai antuntuki aganna lanri untu' passawallang, kalenna ana'-ana'na lannarima pa'balasa'.
17:6 Anne kamma nipianderima' siagang anjo paruntu' kanaya; battui ke'nanga ampi'rui rupangku.
17:7 Tabajikami paccinikku lanri susaku; roso' ta'ronammi sikontu tubuku.
17:8 Tau bajika, ta'bangkai na lannasa'; tau tenaya salana, nakapangi tena Bataraku.
17:9 Tau bajika siagang tau tenaya salana, pila' tappa'mi angkana ningai ri Allata'ala batena attallasa' ke'nanga.
17:10 Mingka ebara' angkana battu ngasengko mae anrinni, manna se're tania' tu cara'de' lakugappa.
17:11 Allalomi allo-allo tallasakku, salasami sikontu rancanaku; tappela' tommi sikontu naminasaya atingku.
17:12 Mingka nakana ngaseng sahabakku, 'Bangngia anjo allo, na'birimmo singaraka battu.' Mingka kuassengi lalang ri pa'maikku angkana tuli sassanna tallasakku.
17:13 Lino kamateang bawang kuminasai, anjoremma' lattinro lalang ri sassang.
17:14 Jerakku kuarengi 'Manggeku', na gallang-gallang angkanreai tubuku kusa'buki 'Ammakku' siagang 'Sari'battang baineku.'
17:15 Kemae minasangku; inai anciniki nia' mate'neku
17:16 Punna kunaung ri linona tau matea, tenamo pa'minasangku."