Ayub 18

18:1-2 Appialimi Bildad angkana, "He Ayub, angngapapi nule'ba' a'bicara? A'mere' mako, na nupilangngeri kamma-kamma anne ikambe ero' a'bicara.
18:3 Angngapa nupakkanai tolo ikambe, na nupasangkamma ikambe siagang sapi?
18:4 Anjo larronu poro kalennuji napa'risi. Apaka musti tappelaki pandudu'na buttaya lanri untu' kaparalluannu, siagang nipalette' sikamma monconga battu ri tampa'na?
18:5 Kanjolina tau ja'dalaka musti nibunoi; tenamo nalaniparinra poleang pepe'na.
18:6 Ta'rinrayami singaraka lalang ri kemana; kanjoli passingarinna tenamo naccaya.
18:7 Ta'royommi dakka porena; rancana kalenna a'jari saba' natatto'ro.
18:8 A'jappai lalang sikko', takkai'mi bangkenna.
18:9 Niallei kacunu'na ri sikko', sa'genna nijakkala'mo.
18:10 Ri butta, nia' taccokko sikko' nitannang; kammayatompa ri oloanna, nia' todong sadia sikko' na tado'.
18:11 Nipabangkai tau ja'dalaka ri apa appakamalla' niaka battu ri kere-keremae; sangnging malla' ampinawangi dakka-dakkana.
18:12 Riolo kassaki, kamma-kamma anne ta'ronammi; bala anrurungangi ri kemae-kemae.
18:13 Nikanrei bukkulenna ri garring sanna'; limanna siagang bangkenna, botto' a'nana.
18:14 Nibesoki assulu' battu ri kemana, tampa' amanna, nampa nire'resang untu' mange andallekang ri kamateang.
18:15 Anne kamma manna inai akkullei ammantang ri kemana, siagang nikioro' anjoreng batu a'baraya, untu' ambunoi ku'mang garrinna.
18:16 Kalotoro'mi siagang akkapurru'mi aka'-aka'na; tangke-tangkenna kalotoro'mi na rokko'.
18:17 Taniassengami, ri lalang yareka ri pantarang kota; tenamo manna sitau angngu'rangi arenna.
18:18 Battu ri singaraka nibongkai antama' ri sassang; nibongkai battu ri lino katallassang.
18:19 Tenamo ana'na na turunganna; ri bori' parang lakkenna tenamo tassesa manna sitau.
18:20 Nalangngere'na sarenna, ta'bangkai pandudu' ilau', na pandudu' rayaya, annekkere'mi lanri malla'.
18:21 Kammaminjo sarenna tau dorakaya, tau tenaya najampangi Allata'ala."