Ayub 23

23:1-2 Mingka appialimi Ayub angkana, "A'jalloka' siagang akkunrarenga' mae ri Allata'ala; takkulleai kutahang pa'risikku.
23:3 Ah, ka'de'ji nakuasseng kemae tampa' Napammantangngi, sollangku akkulle a'lampa, mange assibuntulu' siagang Ia.
23:4 Nakupamaemo ri dallekanNa parkaraku, assulu' ngasemmi kana-kana mappatojengku.
23:5 Erokka' angngassengi angkana apa laNakana, siagang antekamma bateNa lappiali.
23:6 Maka laNapakei koasaNa mae ri nakke? Tena! Mattantu laNapilangngeri kana-kanangku.
23:7 Tena kusala, siagang akkullei kupattojeng kalengku ri dallekanNa, jari lanilappassanga' sa'genna satunggu-tungguna.
23:8-9 Kuboyai Allata'ala, iraya, lau', timboro', wara', mingka kemae-kemae tenai Allata'ala; na tena kukkulle anggappai.
23:10 Mingka Naassengi sikontu jappaku kammayatompa tunggala' dakkaku. Punna sanrapanga' bulaeng kuniuji, la'nyatami angkana ti'noki pa'maikku.
23:11 Majarreka' mannuruki mae ri Ia; tena kule'ba' ammengka battu ri oloang Napattantua.
23:12 Sikamma parentaNa tuli kuturuki, Kupinawangi ero'Na, teai ero' kalengku.
23:13 Anjo Allata'ala tena pamminraNa; tena akkulle angngewai. Nagaukangi apa Nakaerokia.
23:14 LaNapajappai rancanaNa mae ri nakke, na jai iji rancanaNa pantaranganna anjo.
23:15 Lanri mallakku ri Ia, nakuannekkere'mo; pila' kunawa-nawana ngaseng anjo kammaya, pila' malla'ma'.
23:16-17 Naancuru' ngasengi Kaminang Koasaya sikontu kabaraniangku. Mallaka' lanri Allata'ala, teai lanri sassang makkapuna, manna pole natammulilia' anjo sassanga, siagang pole natongko' rupangku."