Ayub 34

34:1-2 "Sai cara'de' ngasengko siagang bajiki akkala'nu? Jari pilangngeri ngasemmi anne kana-kanangku.
34:3 Nakana taua, nyamangi kanrea punna nikanrei, nakana-kana cara'deka punna nipilangngeri.
34:4 Anne passalaka musti niparessai nampa assama-samaki' ampahangi.
34:5 Nakana Ayub, 'Tena sala ri nakke, mingka tena Naero' Allata'ala assarea' kaadelang.
34:6 Napakkanaia' a'balle-balle, lanri kukanana tena kudoraka. Kamma-kamma anne loko' lompoa', manna tena kusala.'
34:7 Le'bakko accini' tau kammaya anne Ayub? Nacalla a'mole-molei Allata'ala.
34:8 Nangai aganga siagang tau dorakaya siagang sileporang tau kodi gauka.
34:9 Nakana, tena matu-matunna punna usaha taua anggaukangi ero'Na Allata'ala.
34:10 He sikamma tau cara'deka, pilangngeri sai! Maka lakkullei Allata'ala Kaminang Koasaya anggaukangi kasalanga?
34:11 Nahukkungi taua situru' panggaukanna, Nagauki taua situru' gau'na.
34:12 TaNagaukangngai Allata'ala Kaminang Koasaya nikanaya kaja'dallang; sikontu taua Nasare ngaseng kaadelang.
34:13 Battu kemae Allata'ala Nagappa kakoasanNa? Inai ampappirannuangi linoa mae ri Ia?
34:14 Ebara' angkana Naallei Allata'ala nyawana rupataua, siagang Naalle ammotere' nappasa' tallasa'na,
34:15 mate ngasemmi sikontu apa a'nyawaya, na'jari limbu'bu'mo taua ammotere' kamma ri assala'na.
34:16 Jari, punna cara'dekko, parhatikangi, tannangi tolinnu na nupilangngeri.
34:17 Apaka nusalakangi anjo Allata'ala adeleka siagang porea? Maka nukapangi Nakabirisi Allata'ala kaadelanga?
34:18 Nahukkungi Allata'ala karaenga siagang pamarentaya punna ja'dala' siagang doraka ke'nanga.
34:19 Tena Nangngalle mae ri sikamma karaenga, yareka Naparioloangngang tau kalumanynyanga na tu kasi-asia. Lanri yangasenna para bate pare'Naji.
34:20 Ri tangngana bangngia, ti'ring mate silalonna ke'nanga. Nahukkungi Allata'ala pamarentaya, na ancuru'mo ke'nanga; gampang sikali bateNa ambunoi ke'nanga tu barania.
34:21 Najannangngi tallasa'na rupataua, Naciniki sikontu dakkana.
34:22 Tena nikana sassang, manna pole antekamma pakka'na, akkulle ancokkoi tau dorakaya.
34:23 Taparalluai Napattantu Allata'ala wattunna, battu rupataua untu' Naadeli.
34:24 Tena naparallu Nasalidiki siagang Naparessa, na Napanaung tukoasaya nampa Naangka' sambenna.
34:25 Saba', le'ba' Naassemmi apa nagaukanga ke'nanga; na Nagulung siagang Naancuru' ke'nanga ri wattu bangngia.
34:26 Natempa ka'rangi ke'nanga lanri dosana, ri dallekannai tau jaia Nahukkung.
34:27 Saba', tamannurukiai ke'nanga ri ero'Na na tanajampangia sikontu parentaNa.
34:28 Ke'nanga passabakkang nakkunrareng tu kasi-asia, karru'na ke'nanga nilangngereki ri Allata'ala.
34:29 Punna tappu' a'merekiji bawang Allata'ala, manna sitau tabarani ancallai. Punna Nacokko rupanNa, manna sitau takkulle ambuntuluki.
34:30 Na tanakulleamo bansa-bansaya untu' antahangi makoasa anjallakangi tau ja'dalaka.
34:31 O, Ayub, apaka le'ba'mi numangakui dosanu mae ri Allata'ala? Le'ba' mako a'janji talanugaukangnga pole dosaya?
34:32 Le'ba'kami nupala' sollanna nipicinikiangko salanu? Le'ba' mako assumpa angkana lanupamarimi anjo panggaukang kammaya?
34:33 Maka lakkullei Naturuki Allata'ala pappala'nu, punna tena nanusitujui panggaukanNa Allata'ala? Kamma-kamma anne ikau musti angngalle kaputusang, teai inakke. Paumi apa panggappanu!
34:34 Sikontu tau cara'deka mattantu lanasitujui; tau cara'de' ampilangngeriai kanangku lanakana
34:35 angkana a'bicara tenai pikkiranna anjo Ayub, siagang angkana tena anggaranna anjo kana-kananna.
34:36 Punna nipilajari bajiki anjo kana-kananna Ayub, la'nyatami angkana sangkammai bicara tau ja'dala' bicaranna.
34:37 Anjo kasalanna natambai pole sirupa dosa; angngewai mae ri Allata'ala, siagang nahinai ri dallekanta ngaseng."