Ayub 36

36:1-2 "Pilangngerimi pole sinampe', siagang sa'barakko, nia' ija lakupau lanri Allata'ala.
36:3 Jai pangngasengangku; lakupa'matu-matui anjo untu' ampa'nyatai angkanaya adeleki Mappa'jariku.
36:4 Tena kana-kanangku takontutojeng; niaki tau cara'de' tojenga ri dallekannu.
36:5 Anjo Allata'ala tamaka poreNa! Sikontuna Napahang ngasengi. Tena manna sitau Nacini' hina.
36:6 Tau dorakaya tena Nalappassangi sallo attallasa', Nasarei kaadelang tau pa'risika.
36:7 Naparhatikangi tau lambusuka, Napa'jari koasai ke'nanga sangkamma karaeng, sa'genna nipakala'biri' ke'nanga satunggu-tungguna.
36:8 Mingka punna nirante bassi taua, sessai lanri panggaukanna tonji,
36:9 jari laNapa'nyatai Allata'ala sikamma dosana siagang kaborroanna ke'nanga.
36:10 Nasuroi ke'nanga ampilangngeri pappasaileNa siagang nabokoi kaja'dallanna ke'nanga.
36:11 Punna mannuruki siagang anynyomba ke'nanga ri Allata'ala, laamangi siagang lakala'biangi ke'nanga lalang tallasa'na sa'genna ammoterang.
36:12 Mingka punna tamappilangngeria ke'nanga, lamatei ke'nanga lalang kadongokanna.
36:13 Tau tenaya nale'ba' nia' Batarana, lammoliki larro; manna nihukkung ri Batara, taerokai ke'nanga appala' bantuang.
36:14 Mate posoi ke'nanga ri wattu rungkana, lanri sangnging hinai lalang tallasa'na.
36:15 Naajaraki Allata'ala rupataua siagang kapa'risang, Napakei kasusaanga untu' ampasailei taua.
36:16 Napakabebasa' mako Allata'ala battu ri kasukkarang, sa'genna akkulle nukasia' kasannangnganga, siagang rassi mejang pangnganreannu siagang kanre.
36:17 Mingka kamma-kamma anne anggappa mako hukkungang situru' kaja'dallannu.
36:18 Tutuko, teako erokki nitipu ri doe' pammuccu'; teako ero' nipa'lingu lanri kakalumanynyangngang.
36:19 Sia-sia jako akkio' appala' bantuang, tena bua'-bua'na sikontu pa'bukuannu siagang kagassingannu.
36:20 Teako nakkuki ri bangngi sassanga, wattu cappu'na siagang lanynya'na sikontu bansaya.
36:21 Tutuko, teako a'lampa mangei ri kadorakanga. Nisessako lanri ero'nu nikellai ambokoi kaja'dallanga.
36:22 U'rangi, angkana anjo Allata'ala tamaka lompona koasaNa. Maka nia' guru naagang sangkamma heba'Na?
36:23 Inai akkulle ampattantui oloanNa yareka barani ampakkanai sala panggaukanNa?
36:24 Ia tuli nipuji lanri bate pare'Na, na ikau pole siratang tongi nupakalompo.
36:25 Sikontu taua Naciniki panggaukanNa; mingka tena manna sitau akkulle ampahang tojeng-tojengi.
36:26 Tamaka mala'biri'Na Allata'ala, takkulleai niselangngi yareka nirekeng siapa sallona taunNa.
36:27 Nabesoki Allata'ala je'neka battu ri butta Napa'jari rammang nampa Napinra a'jari je'ne' bosi ammatti'.
36:28 Napaturungi bosia battu ri rammanga; Napasirangi irateanna rupataua.
36:29 Tena manna sitau ampahangi gio'na rammanga siagang sa'ra gunturuka ri langi' pammantanganNa Allata'ala.
36:30 Nasingari sikontu langika siagang kila', mingka dapara'na tamparanga tuli sassang pakka'na.
36:31 Kammaminjo bateNa antallassi bansa-bansaya na Nasare kanre alla'bi-la'bi.
36:32 Najakkalaki kilaka siagang limanNa nampa Nasuro akkila' ri apa laNatujua.
36:33 Sa'ra gunturu' a'jari pannanrai angkana labattui anging lompoa, manna olo'-olo' piaraya naasseng tongi angkanaya laniaki anging puttusuka."