Ayub 40

40:1-2 "He Ayub, nuewA', iNakke Allata'ala Kaminang Koasaya; erokko ampappibetangi kalennu yareka erokko a'gea'?"
40:3-4 Appialimi Ayub ri Batara, angkana, "A'bicara kamma' tau toloa, o Batara. Apami lakkulle kupappialiang? Tenamo apa-apa ero' lakupau.
40:5 Jai dudumi le'ba' kupau."
40:6 Nampa a'bicaramo pole Batara battu lalang ri anging lompoa mae ri Ayub.
40:7 Nakanamo Batara mae ri Ayub, "A'dalle' maeko ri Nakke sangkamma bura'ne, na nupiali anne sikamma pakkuta'nangKu.
40:8 Maka eroki nusassali kaadelangKu, nupattojeng kalennu nampa iNakke nusalakang?
40:9 Maka gassing kammako iNakke? Maka akkullei sa'rannu a'gunturu' kamma sa'rangKu?
40:10 Beloi kalennu siagang kaga'gang siagang kalompoang, pakei kagammarranga siagang kala'biranga.
40:11 Ciniki ke'nanga tau tinggi pa'maika; pa'betteseki larronu siagang pakatunai ke'nanga.
40:12 Iyo, ciniki tau borroa, siagang padundui! Licaki tau ja'dalaka ri tampa'na
40:13 Tarawang ngasengi ke'nanga lalang ri limbu'buka; kurungi ke'nanga lalang ri linona tau matea.
40:14 Nulanipuji lanri kagassingang kalennu memang todong.
40:15 Parhatikangi lapung jarang niarenga Behemot, olo'-olo' sannaka lompona; sangkamma ikau, ia bate parekKu tonji. Ruku'-rukuka a'jari kanrena, sangkamma sapi biasaya.
40:16 Mingka parhatikangi buku magassing lalanga ri kalenna siagang kakassakang niaka ri ura'-ura'na;
40:17 Napaentengi ingkonna sanrapang poko' kayu arasa', ura'-ura' bongganna sanna' kassa'na siagang terasa'na.
40:18 Buku-bukunna kassaki sangkamma tambaga, bangkenna kassa' tongi sangkamma bassi baja.
40:19 Ri sikamma apa attallasa' bate parekKu, iami kaminang appakalannasa'; Tumappare'na bawang akkulle ambetai!
40:20 Ri bulu'-bulu' pakkare'-karenanna siagang rannu olo'-olo' liaraka, attimbomi rukuka a'jari kanrena ke'nanga.
40:21 Anra'bai irawanganna rompo' katintinga, ri alla'nai nipaya accokko.
40:22 Rompo' katinting alla'langi ke'nanga siagang bayang-bayang. Poko' kayu bangko ri biring binangaya alla'langi ke'nanga.
40:23 Tena sikali malla'na manna nasanna' sarrinna lo'loro'na Binanga Yordan, tuli sannanna manna pole nituju rupanna ri je'ne'.
40:24 Inaika barani ampakabutai matanna, nampa najakkala' siagang natado' muncenna?"