Hosea 6

6:1 Nakana tu Israel, "Umba kimmotere' mae ri Batara. Ia ampa'risi nyawata mingka Ia todong ansaleori. Ia allokoki, mingka Ia todong lamballei anjo bokka'-bokkatta.
6:2 Lalang anne rua yareka tallungalloa laNapa'jari bajikki' ammotere', nakilattallasa'mo ammotere' irawa ri la'lanNa.
6:3 Lanri kammana anjo umbamo kippattujuang tojeng-tojeng untu' angngassengi Batara. Mattantu labattui mae ri katte rapang battuna allo ammumbaya ri bari'basaka, siagang rapang bosi ambasaiyai buttaya ri kala'busang wattu bosia."
6:4 Mingka Nakana Batara, "He tu Israel siagang tu Yehuda! Apa musti Kugaukang mae ri kau ngaseng? Pangngainnu mae ri Nakke poro sinampe'ji natenamo, rapang saliuka ri wattu bari'basa'.
6:5 Lanri kammana anjo Kusuromi battu na'bi-na'biKu untu' ampabattui mae ri kau kaputusangKu angkanaya musti nihukkung ngasengko siagang nipanrakiko. Apa Kukaerokia battu ri kau ngaseng a'nassami siagang singara'mi:
6:6 Kungaiangngangi punna tappakko siagang mangngamaseangko ri Nakke, naia punna attunuko siagang assareko koro'bang mae ri Nakke.
6:7 Mingka sangkamma Adam, nudakkai janjinnu mae ri Nakke.
6:8 Anjo kota Gilead rassi tau ja'dala' siagang pabuno tau.
6:9 Imang-imanga ri anjo kotaya rapangi pa'gompoang paella' eroka angngadangi tau ammaloa. Manna ri oloang mangea ri tampa' matangkasaka ri Sikhem nagaukang tonji ke'nanga pammunoanga! Sikontu anjo kaja'dallanna ke'nanga napakkunjungiangi nagaukang.
6:10 Ri Israel nia' Kucini' apa appakamalla': ummakKu nara'massi kalenna ri anynyombana ke'nanga ri barhalaya.
6:11 Ri sesena ikau, he tu Yehuda, le'ba'mi Kupattantu wattunnu untu' laKuhukkung todong lanri panggaukannu."