Kelong Mala'biri' 1

1:1 Kelong Mala'biri' napareka Salomo. Baine:
1:2 Bauma' siagang muncennu; la'bi nyamangi pangngainu na anggoro'!
1:3 Ikau sanna' mabau'nu, arennu sanrapang minynya' mabau' tattumpaya; lanri kammana minjo nanangaiko tuloloa!
1:4 Umba linta', o, karaengku, eranga' antama' ri kamara'nu. Lanri ikau nama'reja-reja ngaseng ikambe, mammuji ri pangngainu la'bia na anggoro'; siratang memangi tuloloa ero' ri kau!
1:5 Manna kule'leng, mingka ga'gai tanjakku, he tulolonna Yerusalem; le'leng rapang kema-kemana Kedar mingka ga'gai rapang gordeng-gordenna balla' lompona Salomo!
1:6 Teako parhatikangngi bukkuleng le'lengku, lanri nitaba' ri bambang allo. Larro ngasengi sikamma daengku ri nakke, kunasuro anjama ri koko anggoro'; tena kusawe angngurusuki kalengku.
1:7 Paumi, he tanringku, kemaeko akkalawaki gimbala' kemae nupatinro ke'nanga punna karueng? Masakang lasanrapanga' tau padete' ri alla'-alla'na gimbala'na sikamma belanu? Bura'ne:
1:8 Masakang tanuassengai tampa'na, he tuga'gaya ri sikamma bainea? Pinawang mami bate bangkenna gimbalaka, na kalawakimi sikamma bembenu ri ampi' kemana sikamma pakalawakia.
1:9 Tanringku, ikau rapang jarang gana ambesoki karetana karaeng Mesir.
1:10 Ga'gai pilisi'nu alla'na belo-beloa, kallong ga'ganu ammake rante paramata.
1:11 Nipapparekangko belo-belo bulaeng, ammakea mani'-mani' pera'. Baine:
1:12 Lalang anra'bana karaengku ri katinroanna, ma'rasai minynya' mabaukku.
1:13 Tanringku rapangi muru' rasa mabau'na, ri wattu anra'bana ri barambangku.
1:14 Tanringku rapangi bunga attimboa ri koko-koko anggoro' En-Gedi. Bura'ne:
1:15 Teai sipato' ga'ganu, sayang, tojeng tamaka ga'ganu! Matannu, rapangi mata bodobangkeng. Baine:
1:16 Ikau gammara', sayang, tojeng tamaka gammara'nu! Ruku' moncongbuloa katinroanta.
1:17 Poko' kayu arasa' a'jari benteng ballatta, na poko' kayu camara a'jari pammakkanna.