Pammuji 102

102:1 Pappala' doang tau ballasa', sanna' mangnganna nakkunrareng ri Batara.
102:2 O, Batara, Kipilangngeri laloi pappala' doangku, boli'mi kamma nata'rapi' pakkiokku mae ri Katte.
102:3 TeaKi' allei rupanTa battu ri nakke punna niaka' lalang kasusaang. Kipilangngeria' punna akkioka', siagang Kipialia' linta'.
102:4 Tappelaki tallasakku sanrapang umbu; a'barai buku-bukungku sanrapang pepe'.
102:5 Dodonga' sanrapang ruku' kalotoro', tena sikali pattujungku angnganre.
102:6 Akkunrareng lompoa'; bukkuleng mami anrokoki buku-bukungku.
102:7 Sanrapanga' kiti' balang ri parang lompoa, sanrapang kokoci' ri rumbangang sinoa.
102:8 Takkullea' attinro, sanrapang jangang-jangang sinoa ri pattongko' balla'.
102:9 Sila'busu' alloi musua anghina'; napare' pattunrai arengku ri tau larroa mae ri nakke.
102:10 Angnganrea' limbu'bu' sanrapang roti, je'ne' inungku accampuru' je'ne' mata,
102:11 saba' le'ba'ma' Kiangka' nampa Kipasambila' lalang pangngalarroi a'rinra-rinraTa.
102:12 Allaloi tallasakku sanrapang bayang-bayang ri wattu karueng; a'jari kalumenga' sanrapang ruku'.
102:13 Mingka iKatte, o, Batara, Karaeng satunggu-tunggua, tuli niu'rangiKi' ri sikontu turungang.
102:14 LambangungKi' na Kikamaseang Sion, narapi'mi wattunTa untu' mangngamaseang ri ia.
102:15 Saba' ata-atanTa mangngai ri ia, manna pole na'jarimo rumbangang. Tu'guru' mangngamaseangi ke'nanga mae ri ia, manna pole na'jari aumo.
102:16 KoasaNa Batara lanikamallakkangi ri sikontu bansa-bansa; kalompoanna lanikangalikangi ri sikontu karaenga,
102:17 punna nabangung Batara ammotere' Sion, na maju lalang ri kalompoanNa.
102:18 LaNapilangngeri pappala' doanna umma'Na kasi-asia, tena Natollaki pappala'na ke'nanga.
102:19 Tulisi' ngasengi sikontu panggaukanNa Batara untu' turungang labattua sallang, sollanna bansa tenayapa nilassukangi akkullei mammuji mae ri Ia.
102:20 Acciniki Batara battu rate ri tampa' tinggina, battu ri suruga attoa' naung ri lino
102:21 untu' ampilangngeri kunrarenna tunitahanga na Napakabebasa' tau nihukkung matea.
102:22 Nalanikabarrang arenNa ri Sion, siagang lanipuji-puji ri Yerusalem,
102:23 ri wattunna a'rappungang bansa-bansaya siagang sikamma kakaraenganga untu' a'gau' ibada mae ri Batara.
102:24 Natepoki Batara kagassingangku ri wattungku rungka ija, siagang Napakabodo umurukku.
102:25 Nampa kukana, "O, Allata'ala, teaKi' allei nyawaku ri tangnga-tangngana tallasakku." O, Batara, iKatte attallasa' satunggu-tungguna,
102:26 riolo iKatte ampa'jari linoa; langika pole bate paretTa todong.
102:27 Yangasenna anjo lalanynyaki, mingka iKatte tuli niatTa; sikontuna anjo latoai sangkamma care-care. Kipelaki sanrapang baju toa, nampa laposso' ngaseng.
102:28 Mingka iKatte tulusu' kammaTa, tena kale'bakkanna tallasatTa.
102:29 Lasannangi katallassanna ana' cucunna ikambe, siagang tuli amang lalang ri pa'la'langanTa.