Pammuji 103

103:1 Battu ri Daud. Pujimi Batara, he nyawaku, sikontu pa'maikku, pujimi areng matangkasa'Na.
103:2 Pujimi Batara, he nyawaku, teako kaluppai sikontu kabajikanNa!
103:3 Iami ampamopporangi sikontu dosanu, ampamollei sikontu garrinnu,
103:4 Ia ampakabebasaki nyawanu battu ri kuburuka, assareko pangngamaseang alla'bi-la'bi.
103:5 Ia ampassukkuki katallassannu siagang kabajikang, sa'gennu tanaallea toa sanrapang jangang-jangang rajawali.
103:6 Napajappai Batara hukkunga siagang kaadelanga mae ri sikontu tau nijallakkanga.
103:7 Napa'nyatai rancanaNa mae ri Musa na sikamma gau'-gau'Na mae ri bansa Israel.
103:8 Saba' mangngamaseangi na mangngarimangngi Batara, la'bu sa'bara' na alla'bi pangngamaseang.
103:9 Tena Natuli angga'gara', siagang tena Natuli larro satunggu-tungguna.
103:10 Tena Nahukkungki' simbattala'na dosata, yareka Nabalasakki' simbattala'na kasalanta.
103:11 Mingka antekamma tinggina langika battu ri buttaya, kammaminjo lompo pangngamaseanNa mae ri tau mappilangngeria.
103:12 Antekamma bellana battu raya sa'genna kalau', kammaminjo bellana Napela' dosa-dosata.
103:13 Sanrapang se're mangge mangngamaseang ri ana'-ana'na, kammaminjo Batara mangngamaseang ri tau mappilangngeria.
103:14 Saba' Naassengi Batara angkana battu ri apaki' nipa'jari, Nau'rangi angkana poro limbu'bu' buttajaki' bawang.
103:15 Sanrapangi ruku' bodona tallasa'na rupataua; a'bakkaki sanrapang bunga ri kokoa;
103:16 lanynya'mi punna niiri' ri anging, manna tampa'na tena tommo naniassengi.
103:17 Mingka tuli Nakamaseangi Batara tu mappilangngeria, tulusu' a'jarina kabajikanNa ri sikontu turungang,
103:18 mae ri tau anna'galaka ri parjanjianNa, na tamamminraya anggaukangi parentaNa.
103:19 Ammarentai Batara ri suruga, Ia Karaeng makoasa mae ri sikontu-kontuna.
103:20 Pujimi Batara, he malaeka'-malaeka' gammaraka, ampilangngeriai siagang anggaukangai parentaNa.
103:21 Pujimi Batara, he sikontu apa niaka ri suruga, sikontu atanNa anggaukangai ero'Na.
103:22 Pujimi Batara, he sikontu apa nipa'jaria ri sikontu kakoasanNa. Pujimi Batara, he nyawaku!