Pammuji 108

108:1 Kelong-kelong. Pammujina Daud.
108:2 Majarreki tappakku, o, Allata'ala, erokka' akkelong siagang mammuji mae ri Katte. He ambangungko, nyawaku!
108:3 He ambangungko, gambusu' siagang kacapi! Erokka' ampabangungi bari'basaka.
108:4 O, Batara, erokka' appala' sukkuru' mae ri Katte ri alla'na bansa-bansaya. Erokka' akkelong kelong pammuji mae ri Katte ri alla'na umma' rupataua.
108:5 Saba' pangngamaseang lompoTa narapiki langika siagang nyawa tamamminraTa sa'genna rammanga.
108:6 O, Allata'ala, Kipappicinikangi kalompoanTa ri langi', siagang kala'biranTa ri sikontu linoa.
108:7 Kipasalamaki ikambe siagang koasaTa, Kipilangngeri pappala' doanna ikambe, sollanna nipasalama' sikamma tau Kikamaseanga.
108:8 Battu ri pammantangang matangkasa'Na Nakana Allata'ala, "ErokKa' akkio' rannu na Kubage-bage butta Sikhem, ka'bung Sukot laKugoccangi nomoroka.
108:9 Gilead siagang Manasye iNakke pata, Efraim topi bajaKu, siagang Yehuda takkang kakaraengangKu.
108:10 Mingka Moab iami tampa' pa'bissang bangkengKu; akkio' rannuA' ammeta mae ri Filistea. Mae ri Edom Kupasambila pa'lapa' bangkengKu, a'jari tanra angkana iNakke ampatangi."
108:11 Inai langngeranga' mange ri Edom? Inai lanrurunganga' mange ri anjo kota pattahangnganga?
108:12 O, Allata'ala, tenaka Kimminawang siagang ikambe? Tenaka Kimaju siagang tantarana ikambe?
108:13 Kitulungi ikambe mae ri musua, saba' tena matu-matunna bantuanna rupataua.
108:14 Labaraniki' punna Narurungangki' Allata'ala; Iami ambetai musunta.