Pammuji 112

112:1 Pujimi Batara! Mate'nei tau mappilangngeria, mangngaia ri sikamma parentaNa Batara.
112:2 Lakoasai ana'-ana'na ri anne pa'rasanganga, turungang tau baji' siagang lanibarakkaki.
112:3 Lakalumanynyangi siagang lacoppongi kaluargana, siagang lasalewangangi satunggu-tungguna.
112:4 Accayai singaraka lalang ri sassanga mae ri tau lambusuka, mae ri tau adeleka, mangngamaseanga siagang manynyayanga.
112:5 Mate'nei tau lammoro' pa'maika siagang tau nangaia appapiinrang kammayatompa tau lambusuka lalang sikontu urusang.
112:6 Tau bajika tena nalanipassalasa; tuli laniu'rangi satunggu-tungguna.
112:7 Tena namalla' annarima kabara' kodi, jarreki pa'mai'na lanri tappaki ri Batara.
112:8 Tena nalussa' yareka malla', lanri tappaki angkana lanibetai musunna.
112:9 Lanabage-bagei barang-baranna, siagang assare passidakka mae ri tu kasi-asia; tuli nagaukangi bajika, lanri kammanami nakoasa siagang nipakalompo.
112:10 Niciniki ri tau ja'dalaka siagang a'jari larroi; nakantisiki giginna ke'nanga lanri birisi'na. Nampa posso'mo ke'nanga; tappela'mi panrannuanna ke'nanga satunggu-tungguna.