Pammuji 116

116:1 Mangngaia' ri Batara, saba' Napilangngeria' na Naparhatikang pappalakku.
116:2 Napilangngeria', kere-kere wattu nakukkio' mae ri Ia.
116:3 Lanatujua' bahaya kamateang; bala lompona kamateanga nabakkaia', kunapa'jari lussa' siagang malla'.
116:4 Jari akkio'ma' mae ri Batara, angkana, "O, Batara, kupalaki, naKipasalamaka'!"
116:5 Anjo Batara mangngamaseangi siagang adeleki; Allata'alata la'bi ri pangngamaseang.
116:6 Naparakai Batara sikamma tau biasaya; wattunna tena pakkulleku Ia ampasalamaka'.
116:7 Kupakasannangi pa'maikku, saba' bajiki Batara mae ri nakke.
116:8 Napata'lappasa'ma' Batara battu ri kamateanga; Nasaleoria' siagang tena Nalappassanga' tu'guru'.
116:9 Jari akkullemi kukasia' tallasaka ri anne linoa, lalang pa'la'langanNa Batara.
116:10 Tuli tappaka', manna kukana mamo, "Sanna' bateku nijallakkang."
116:11 Lalang kalinguangku nakukana, "Tena manna sitau akkulle nipatappa'."
116:12 Apa kupassareang mae ri Batara untu' ambalasaki kabajikanNa mae ri nakke?
116:13 Erokka' angngerang passare anggoro' mae ri Batara untu' angkasukkurangi pannulunNa.
116:14 Lakurupai janjingku ri Ia ri dallekanna sikontu umma'Na.
116:15 Tamaka manynyayanNa Batara ri kamateanna se're tunikamaseanna.
116:16 Inakke anne atanTa, o, Batara, sanrapang ammakku, anynyomba tonga' mae ri Katte Kilappassamma' battu ri tahananga.
116:17 Langngeranga' koro'bang sukkuru' mae ri Katte, nakuappanai' pappala' doang mae ri Katte.
116:18 Lakurupai janjingku mae ri Batara, ri dallekanna sikontu umma'Na
116:19 a'rappunganga lalang ri paranglakkeng Balla'Na Batara, ri tangnga kotana Yerusalem. Nipujimi Batara!