Pammuji 124

124:1 Kelong siara battu ri Daud. Antekamma ebara' tena Naagangngangki' Batara? He Israel, appialiko angkana,
124:2 "Ebara' angkana tena Naagangngangki' Batara wattunta nibakkai ri balia,
124:3 le'ba' maki' naa'lu' attallasa', lanri allumpana larrona ke'nanga.
124:4 Le'ba' maki' nalo'lorang a'ba, siagang napammantangngi je'ne';
124:5 mate tallang maki' lalang ri pocci'na je'ne' appakamallaka."
124:6 Umba kippala' sukkuru' mae ri Batara, lanri tena Nabalang parekangki' niposso' ri balia.
124:7 Sanrapangki' jangang-jangang lappasaka battu patannang sikkoka, tappu'mi anjo sikkoka, nakilappasa'mo!
124:8 Pannulunta iamintu battu ri Batara ampa'jariai langika siagang linoa.