Pammuji 132

132:1 Kelong siara. O, Batara, angngu'rangiKi' mae ri Daud, siagang sikontu pa'risi'na.
132:2 TeaKi' kaluppai sombana mae ri Katte, o, Batara, ri tinja'na mae ri Kaminang Gassinga, Allata'alana Yakub.
132:3-4 Nakana, "Tena kulammari-mari ri ballakku yareka attinro ri tampa' katinroangku,
132:5 punna tenapa kuppasadia balla' untu' Allata'alana Yakub, tampa' pammantangang untu' Batara Kaminang Gassinga."
132:6 Ri Betlehem nilangngereki passala' Patti Parjanjianga, nampa nibuntulu' ri parang Yaar.
132:7 Umba ki'lampa mange ri tampa' pammantanganNa Batara, ansombai ri dallekang empoang kala'biranNa.
132:8 Battu maKi' siagang ammantang maKi' ri BallatTa, o, Batara, siagang Patti ParjanjianTa, tanra kakoasanTa.
132:9 Poro akkio' rannu ummatTa, na sikontu imanTa tuli naturuki erotTa lalang tallasa'na.
132:10 Lanri Daud, atanTa, teaKi' sorongbokoi karaeng nipileTa.
132:11 Le'ba'mi assumpa Batara mae ri Daud; tena nalaNakaluppai janjinNa. Nakana, "Sitau ana'nu laKupa'jari karaeng untu' ammarenta ansambeangko.
132:12 Punna tamamminraya ana'-ana'nu mae ri parjanjiangKu, siagang mannuruki ri sikamma parentaKu, jari untu' satunggu-tungguna turunganna ke'nanga lansambeangko a'jari karaeng."
132:13 Saba' le'ba'mi Napile Batara Sion; Naerokangi untu' a'jari tampa' pammantanganNa.
132:14 Nakana, "Anrinnimi pammantangangKu sa'genna satunggu-tungguna, erokKa' ammarenta ri anne tampaka.
132:15 Sikontu kaparalluanna laKusarei alla'bi-la'bi, tu kasi-asina laKusarei kanre sa'genna bassoro'.
132:16 Imang-imanna ampappicinikangi kasalamakkang battua ri Nakke; lakkelongi umma'na siagang akkio' rannu.
132:17 Anrinni sitau turunganna Daud Kupa'jari karaeng; laKupakajarreki pamarentahanna.
132:18 Tuli lasalewangangi kakaraenganna, mingka musu-musunna lanipakasiriki."