Pammuji 136

136:1 Sukkurukko mae ri Batara, saba' Ia bajiki; pangngamaseanNa sa'genna satunggu-tungguna.
136:2 Sukkurukko mae ri Allata'ala Kaminang Tenaya Ruanna; pangngamaseanNa sa'genna satunggu-tungguna.
136:3 Sukkurukko mae ri Batara Kaminang Tinggia; pangngamaseanNa sa'genna satunggu-tungguna.
136:4 Iaji bawang akkulle anggaukangi gau'-gau' appakalannasa' lompoa; pangngamaseanNa sa'genna satunggu-tungguna.
136:5 Lanri kaporeanNa napa'jari langika; pangngamaseanNa sa'genna satunggu-tungguna.
136:6 Napalaparaki buttaya irate ri tompo'na je'neka; pangngamaseanNa sa'genna satunggu-tungguna.
136:7 Appareki barang-barang angngeranga singara' ri langi'; pangngamaseanNa sa'genna satunggu-tungguna;
136:8 mataallo untu' angkoasai singaraka; pangngamaseanNa sa'genna satunggu-tungguna;
136:9 bulang siagang bintoeng angkoasai bangngia; pangngamaseanNa sa'genna satunggu-tungguna.
136:10 Nabunoi sikontu ana' bungasa'na tu Mesir; pangngamaseanNa sa'genna satunggu-tungguna.
136:11 Naantaraki tu Israel assulu' battu ri Mesir; pangngamaseanNa sa'genna satunggu-tungguna;
136:12 siagang lima kassa'Na na kalompoanna pangngamaseanNa sa'genna satunggu-tungguna.
136:13 Tamparang Alara' Nabage ruai; pangngamaseanNa sa'genna satunggu-tungguna;
136:14 Israel umma'Na, Napalimbangi anta'le; pangngamaseanNa sa'genna satunggu-tungguna.
136:15 Mingka karaeng Mesir siagang tantarana natallangngangi; pangngamaseanNa sa'genna satunggu-tungguna.
136:16 Napimpingi umma'Na allalo ri parang lompoa; pangngamaseanNa sa'genna satunggu-tungguna.
136:17 Nabetai sikamma karaeng porea; pangngamaseanNa sa'genna satunggu-tungguna;
136:18 nabunoi sikamma karaeng masahoroka; pangngamaseanNa sa'genna satunggu-tungguna;
136:19 Sihon, karaeng Amori; pangngamaseanNa sa'genna satunggu-tungguna;
136:20 siagang Og, karaeng Basan; pangngamaseanNa sa'genna satunggu-tungguna.
136:21 Pa'rasanganna ke'nanga Napassareangi mae ri umma'Na; pangngamaseanNa sa'genna satunggu-tungguna;
136:22 a'jari Napatang Israel atanNa; pangngamaseanNa sa'genna satunggu-tungguna;
136:23 Tena Nakaluppaiki' ri wattunta nibeta; pangngamaseanNa sa'genna satunggu-tungguna.
136:24 Nalappassangki' battu ri musua; pangngamaseanNa sa'genna satunggu-tungguna.
136:25 Sikontu apa-apa attallasaka Nasarei kanre; pangngamaseanNa sa'genna satunggu-tungguna.
136:26 Sukkurukko mae ri Allata'ala makoasaya ri langika; pangngamaseanNa sa'genna satunggu-tungguna.