Pammuji 138

138:1 Battu ri Daud. O, Batara, erokka' appala' sukkuru' mae ri Katte, lalang sibatu pa'maikku. Ri dallekanna sikontu rewataya kukkelong lagu pammuji mae ri Katte.
138:2 Su'juka' a'dalle' mae ri Balla' matangkasatTa nakupuji arenTa, saba' tamamminrayaKi' siagang tulusu' mangngamaseangKi'. La'bi Kiparalluangangi janjinTa kala panggappa pikkiranna taua mae ri Katte.
138:3 Wattungku akkio' mae ri Katte, appialiKi', Kipakajarreki pa'maikku sa'gengku a'jari barani.
138:4 Sikontu karaenga ri lino lamammuji ri Katte, o, Batara, saba' nalangngere'mi ke'nanga janjinTa.
138:5 Lakkelongi ke'nanga ri passala'na panggaukanTa siagang ri passala' kalompoanTa.
138:6 Tamaka la'biritTa, mingka tau tunaya Kiparhatikang tongi; tau borroa takkulleai accokko battu ri Katte.
138:7 Wattungku nituju ri kasusaang, Kipartahangkangi tallasakku. Kiewai musungku sitabanga a'jallo' nampa Kipasalamaka' siagang koasaTa.
138:8 IKatte lanrupai janjinTa mae ri nakke; teaKi' ammari angngalle tindakang untu' ummatTa.