Pammuji 140

140:1 Untu' pamimping pakelong. Pammuji battu ri Daud.
140:2 Kilappassanga' battu ri tau ja'dalaka, o, Batara, Kijagaia' battu ri tau anggaukangai katerassanga.
140:3 Narancanakangi ke'nanga kaja'dallanga lalang ri pa'mai'na, siagang allo-allona appa'nia' pa'beserang.
140:4 Lilana ke'nanga sanrapangi ulara' nia' racunna, kana-kananna ke'nanga sanrapangi racunna ulara' le'lenga.
140:5 O, Batara, Kijagaia' battu ri koasana tau ja'dalaka, jagaia' battu ri tau anggaukangai katerassanga eroka antu'guranga'.
140:6 Sanna' tampona ke'nanga a'mere'-mereki antannangngia' sikko', napalaparaki sikkoka untu' anjakkalaka'. Ri siapa la'buna aganga natannang ke'nanga sikkoka untu' anjakkalaka'.
140:7 O, Batara, kukana: IKattemi Allata'ala, Kiparhatikanga' lalang pappala' doangku.
140:8 O, Batara, Allata'alaku, mappasalamakku magassinga, le'ba'ma' Kijagai lalang pa'bundukang.
140:9 TeaKi' turukiangi ero'na tau ja'dalaka, o, Batara, teaKi' lappassangi anjari rancanana ke'nanga.
140:10 TeaKi' lappassangi musungku ammeta; boli'mi kamma kana-kana ja'dala' napau ke'nanga iaminjo antujui kalenna ke'nanga ampitinaya'.
140:11 Boli'mi kamma nipibosi ke'nanga ri bara pepe', nampa nipela' antama' ri kali'bong kamateanga, sa'genna takkullea assulu' poleang.
140:12 Boli'mi kamma nituju ri bala lompo tau anggaukangai katerassanga, teaKi' lappassangi ammantang ri lino tau nangaia appitina.
140:13 Kuassengi angkana iKatte assarei kaadelang tau nijallakkanga, siagang ampattojengi parkarana tu kasi-asia.
140:14 Tau lambusuka lamammuji mae ri Katte; lammantangi ke'nanga siagang iKatte.