Pammuji 143

143:1 Pammuji battu ri Daud. O, Batara, Kipilangngeri pappala' doangku, Kiparhatikangi pappalakku. Kipialia' lanri tamamminraTa, Kiturukianga' pappala' doangku lanri kaadelanTa.
143:2 Inakke anne atanTa, teaKi' adelia', saba' taniakka tau tania' salana ri dallekanTa.
143:3 Naondamma' musungku siagang nabetama', nampa napantamaka' ri tarungku sassanga; a'jarima' sanrapang tau salloamo mate.
143:4 Tappu'mi sumangakku, sanna' linguna pa'maikku.
143:5 Kuu'rangi allo-allo allaloa; kunawa-nawai sikontu panggaukanTa, kupikki'-pikkiri' sikamma bate paretTa.
143:6 Kupatara limangku appala' doang mae ri Katte; sanrapang butta kalotoro', nakkuki nyawaku mae ri Katte.
143:7 Kipialia' linta', o, Batara, saba' tappu' minasama'. TeaKi' accokkoi battu ri nakke, sollanna tena nakusangkamma tau naungamo ri lino kamateanga.
143:8 Punna bari'basa', Kipiu'rangianga' pangngamaseanTa, saba' ri Kattemi panrannuangku. Kipicinikianga' oloang mustia kuolo, saba' ri Kattema' appala' doang.
143:9 Battua' ero' a'la'lang mae ri Katte, o, Batara, Kilappassanga' battu ri musu-musungku.
143:10 Ajaria' anggaukangi erotTa, saba' iKattemi Allata'alaku. IKatte baji' pa'mai' lanrenrenga' mange ri oloang lapparaka.
143:11 Kipasalamaka' situru' janjinTa, o, Batara, lanri kabajikanTa, Kilappassanga' battu ri kasukkarranga.
143:12 Lanri pangngamaseanTa Kitumpasaki sikontu musungku, kiancuruki sikontu tau anjallakkangia', saba' inakke atanTa'.