Pammuji 147

147:1 Pujimi Batara! Saba' bajiki ammujia mae ri Ia, siagang sannangi pa'maika akkelonga mammuji mae ri Ia!
147:2 LaNapammollei Batara Yerusalem; laNapoterangi sikamma tau nipelaka.
147:3 Napammollei tau la'baya pa'mai'na, siagang Naballei loko'na ke'nanga.
147:4 Napattantui jaina bintoenga ri langi', siagang massing Nasarei areng.
147:5 Tamaka lompona siagang heba'Na Batarata, kacara'dekanNa tenanjorenganna.
147:6 Napabangungi tau nijallakkanga, mingka tau ja'dalaka Napatappasaki naung ri buttaya.
147:7 Kelongangi pammuji-mujia mae ri Batara, ko'biki kacapia mae ri Allata'alata.
147:8 Iami ampaka'rangi rammanga' ri langi'; Ia ampasadiai bosia mae ri buttaya, siagang ampatimboi rukuka ri buluka.
147:9 Nasarei kanre olo'-oloka, siagang ana' jangang-jangang akkio'-kioka.
147:10 Nangaia Batara teai jarang kassaka; teai todong pejuang barania.
147:11 Ia Nangaia Batara iamintu tau mappilangngeria, tau tuli manrannuanga ri pangngamaseanNa.
147:12 Pujimi Batara, he Yerusalem! Pujimi Allata'alanu, he Sion!
147:13 Saba' Ia ampakajarreki sikamma pakke'bu' lomponu, Ia ambarakkaki pandudu'nu.
147:14 Ia anjagai daeranu sollanna tuli amang, ampakabassorokko siagang gandung kaminang bajika.
147:15 Ia assare parenta mae ri buttaya, na nigaukammo linta' kananNa.
147:16 Ia ampaturungi bosi eska sanrapang kapasa', ampakioroki saliuka sanrapang limbu'bu'.
147:17 Ia ampaturungi bosi eska sanrapang batu-batu ca'di; tena akkulle attahang andallekangi dinginna.
147:18 Nampa lanri parentaNa nassolong anjo eska; napammiriki anginga, nampa a'lo'loro'mo je'neka.
147:19 Napabattui pasanNa mae ri umma'Na, katantuanNa siagang hukkunNa mae ri umma' nipileNa.
147:20 Tena Nagaukangi kammaya mae ri bansa-bansa maraenga, tena naassengi ke'nanga hukkung-hukkunNa. Pujimi Batara!