Pammuji 16

16:1 Pammujina Daud. Jagaia', o, Allata'ala, saba' iKattemi kupa'la'langi.
16:2 Kukana, "IKattemi Bataraku, kate'neangku, tenamo la'biangngang naiKatte!"
16:3 Kupakalompoi sikamma tu matangkasaka ri anne pa'rasanganga; pangngaingku iamintu ammantanga siagang ke'nanga.
16:4 Boli'mi kamma tu anynyombaya ri rewata-rewata pila' katambang si'nana. Taeroka' assare koro'bang mae ri rewata-rewataya, ba'lalo taeroka' ampaui arenna ke'nanga.
16:5 O, Batara, iKatteji bawang Bataraku; Kisarea' sikontu apa kuparalluanga, sarengku niaki lalang limanTa.
16:6 Teai sipato' ga'gana passareTa mae ri nakke, sanna' napakasannanna pa'maikku!
16:7 Mammujia' ri Batara, Ia ampakaingaka'; manna ri wattu bangngina nipasailea' ri sa'ranna pa'maikku.
16:8 Tuli mangngu'rangia' ri Batara; niaki ri sa'ringku, Iami saba' natena kuta'lengga.
16:9 Lanri kammanami narannu pa'maikku siagang ma'reja-reja nyawaku, na sannang mammari-mari poso batangkalengku.
16:10 Saba' tena Kilappassanga' mate; taKilappassangai posso' tu Kikamaseanga.
16:11 Kipicinikianga' oloang mangea ri katallassanga; battu ri Kattema' anggappa karannuang alla'bi-la'bi siagang mate'ne sa'genna satunggu-tungguna.