Pammuji 2

2:1 Angngapa nappare' ricu bansa-bansaya na'rancana suku bansaya apa tama'matu-matua?
2:2 Assamai ambangung sikamma karaenna lino na situju sikamma pinggawaya mangngewa ri Batara karaeng nipileNa.
2:3 Nakanamo anjo pinggawa-pinggawaya, "Umba nita'bangi koasana ke'nanga na nire'bu' kabebasanta!"
2:4 A'mele'mi Batara ri empoang kala'biranNa ri suruga nacau-cau rancanana ke'nanga.
2:5 Nampa Naga'gara' larro ke'nanga, Napata'bangka ri pangngalarroiNa.
2:6 Nakana, "Ri Sion bulu' matangkasakKu le'ba' Kulanti' karaeng nipileKu."
2:7 Nakana Karaeng, "Eroki laKupa'la'bang apa Napattantu Batara. Nakana ri nakke, 'Ikau ana' bura'neKu, anne alloa iNakke a'jari Manggenu.
2:8 Palaki, naKupassareang sikontu bansaya ri kau, sikontu buttaya Kupa'jari ikau pata.
2:9 Lanutepoki ke'nanga siagang takkang bassi na nupokara' sanrapang uring butta.' "
2:10 Jari parhatikangi, ikau sikamma karaeng, paripa'maiki, ikau sikamma pinggawana lino!
2:11 Manynyombako ri Batara numannuruki,
2:12 su'jukko mannekkere' ri dallekanNa, gassingka ma'jari larroi Batara na Naposso' silalonnako, saba' ti'ring a'rinra larroNa. Mate'nei taua ma'la'langa ri Batara!