Pammuji 25

25:1 Pammujina Daud. Ri Katte, o, Batara, kupanai' pappala' doangku,
25:2 o, Allata'alaku, matappaka' ri Katte! TeaKi' lappassangia' nipakasiri', na nigorai ri musu-musungku.
25:3 Tu ta'baleka ri Katte lanipakasiriki, mingka tu tappaka ri Katte tena nalanipassalasa.
25:4 Kipicinikianga' erotTa, o, Batara, Kipa'nyatai apa musti lakugaukang.
25:5 Ajaraka' siagang renrenga' untu' attallasa' situru' erotTa, saba' iKattemi Allata'ala ampasalamaka', tuli manrannuanga' mae ri Katte.
25:6 Kiu'rangi kabajikanTa siagang pangngamaseanTa, o, Batara, le'baka Kipappicinikang battu riolo.
25:7 Pammopporangi dosaku siagang kasalangku ri wattu rungkaku, u'rangia' situru' pangngamaseanTa siagang kabajikanTa.
25:8 Saba' Batara bajiki na adele', Napicinikiangi oloang tau lingua.
25:9 Narenrengi Batara tu tuna pa'maika, na Naajara' ke'nanga apa Nakaerokia.
25:10 Tau mannurukia ri parjanjianNa siagang hukkunNa, Nagau' kamasei siagang tamamminrayai.
25:11 O, Batara, Kipammopporanga' situru' janjinTa, saba' lompoi kasalangku.
25:12 Kipangngajarrangi mae ri tumappilangngeria oloang musti naoloa ke'nanga.
25:13 Tuli lasukkuki ke'nanga lalang tallasa'na, lanawarisiki ana' cucunna ke'nanga tana pisakaya,
25:14 Batara belana tu mappilangngeria, Napappiassengangi ri ke'nanga apa Nakaerokia.
25:15 Matangku tuli tattujui mange ri Batara, saba' Napasalamakka' battu ri bahayaya.
25:16 Cinikia', siagang kamaseanga', saba' Napasalamakka' battu ri bahayaya.
25:17 Pila' katambangi susana pa'maikku Kilappassang laloa' battu ri kasukkarrangku.
25:18 Kiparhatikangi sessaku siagang kasukkarrangku, siagang Kipammopporangi sikontu dosaku.
25:19 Kiciniki antekamma jaina musungku; ke'nanga sanna' nakabirissingku.
25:20 Jagaia' siagang Kipasalamaka', sollanna tena kunggappa siri' saba' ma'la'langa' mae ri Katte.
25:21 Poro nirurungang laloa' ri kabajikang siagang kalambusang, saba' manrannuanga' mae ri Katte.
25:22 O, Allata'ala, Kilappassangi ummatTa battu ri sikontu kasukkarranna.