Pammuji 26

26:1 Pammujina Daud. Kisarea' kaadelang, o, Batara, saba' lambusu' pa'maika' lalang tallasakku. Manrannuanga' mae ri Batara, Tena kuranggasela manna sike'de'.
26:2 Kiparessama', o, Batara, siagang Kiso'rima', paressami kaerokangku siagang nawa-nawangku.
26:3 Tuli mangngu'rangia' ri pangngamaseanTa, siagang tuli tamamminraya' mae ri Katte.
26:4 Taeroka' a'rappungang siagang tu patipua, yareka sileporang siagang tu munapeka.
26:5 Kukabirisi passe'reanna tu a'gau' ja'dalaka, kuliliangi pa'rappunganna tu ja'dalaka.
26:6 Kubissai limangku pammatei tena kusala, na ku'jappa angnginroi tampa' pakkoro'bangnganTa, o, Batara,
26:7 nakukkelong lagu appala' sukkuru', na kukabarrang gau' malompoTa.
26:8 Kungai BallatTa, o, Batara, tampa' pammantangang kalompoanTa.
26:9 TeaKi' bunoia' siagang tu dorakaya, yareka teaKi' allei nyawaku assama siagang tu appasolonga cera'.
26:10 ke'nanga tuli a'gau' ja'dala'na, tuli sadiana untu' annarima pappacoco'.
26:11 Mingka inakke lambusu' pa'maikka' lalang tallasakku, Kikamaseanga' siagang Kilappassang laloa'.
26:12 Jari amanga' battu ri sikontu bahayaya, lamammujia' ri Batara lalang ri passe'reang umma'Na.