Pammuji 29

29:1 Pammujina Daud. Pujimi Batara, he sikamma niaka ri suruga, pujimi kalompoanna siagang kakoasanNa.
29:2 Pujimi arenNa Batara mala'birika sombami nummake pakeang ibada.
29:3 Allata'ala malompoa a'gunturuki irateanna tamparanga, sa'ranNa kalangngerangi irateanna tamparang lompoa.
29:4 Kalangngerangi sa'ranNa Batara, lalang koasa lompo siagang kagammarrang.
29:5 Sa'ranNa Batara manrumbang poko'-poko', mannepo' tangke kayunna camara Libanon.
29:6 Napalumpaki Moncong Libanon sanrapang ana' sapi, a'lumpaki Moncong Siryon sanrapang ana' tedong romang.
29:7 Sa'ranNa Batara, angngerang kila' akkila'.
29:8 Sa'ranNa Batara Nage'gosoki parang lompoa, Nage'gosoki Batara parang lompo Kades.
29:9 Sa'ranNa Batara Nagoccangi poko'-poko' kayu lompoa, Naru'rusuki leko'-leko' kayua ri romanga; nampa akkio'mo ummaka ri Balla'Na Batara ri Yerusalem, angkana, "Pujimi Batara!"
29:10 Makoasai Batara ri a'ba lompoa, makoasai salaku Karaeng sa'genna satunggu-tungguna.
29:11 Poro nisare lalo kagassingang umma'Na ri Batara, na Napa'jari ke'nanga salewangang.