Pammuji 35

35:1 Pammujina Daud. O, Batara, Kiewai tau angngewaya', Kibunduki tau ambundukia'.
35:2 Kiallei pa'lapa' barambanTa, siagang ammenteng maKi' antulunga'.
35:3 Angkaki paccokaTa siagang pokeTa nampa Kiewa tau angngondangia'. Kipaumi ri nakke angkana iKatte Tumappasalamakku.
35:4 Boli'mi kamma tau eroka ambunoa' nibeta na nipakasiri'. Boli'mi kamma tau assikongkoloka ambalianga' ammunduru' siagang lingu.
35:5 Boli'mi kamma niondang ke'nanga ri malaeka'Na Batara, sanrapang awang nipasiara' ri anging.
35:6 Boli'mi kamma niondang ke'nanga ri malaeka'Na Batara, ri oloang sassanga siagang laccuka.
35:7 Sia-siaji ke'nanga attannang sikko' untu' inakke yareka angngeke kali'bong untu' anjakkalaka'.
35:8 Boli'mi kamma ke'nanga nituju ri posso' tena nasanna-sannai ke'nanga. Boli'mi kamma nijakkala' ke'nanga ri sikko' napareka kalenna nampa tu'guru' na posso'.
35:9 Kumakkio' ma'rannu-rannu lanri Batara, rannui pa'maikku lanri Ia ampasalamakka'.
35:10 Nakanamo sikontu pa'maikku, "O, Batara, tena sanrapanTa! Kilappassangi tau lammaya battu ri tau gassinga, tu kasi-asia siagang tu pa'risika battu ri tumanjallakkanna."
35:11 Sa'bi-sa'bi ja'dalaka ambangungi ambalianga', siagang natudua' anggaukangi apa-apa tenaya kuassengi.
35:12 KabajikanTa nabalasaki kaja'dallang; tallanga' lalang ri tappu' minasaku.
35:13 Ri wattunna garring ke'nanga, si'nai pa'maikku kutangnganrea; appala' doanga', kupadundu ulungku,
35:14 sanrapang tau ampappala' doangangi sari'battanna yareka ampappala' doangangi bela baji'na. Andundua', angkarruki ke'nanga, sanrapang tukamateanga' ri amma' kalengku.
35:15 Mingka ri wattungku susa, sannangi pa'mai'na ke'nanga, siagang a'rappungammi ambalianga'. A'jappa keppang-keppangi ke'nanga untu' ancau-caua'.
35:16 Tena nammari-mari ke'nanga ancau-caua', siagang birisi' sikali ancinikia'.
35:17 Sa'genna kemae wattu, o, Batara, sa'genna kemae wattu, Kicini'-cinikija' bawang? Kipasalama' laloa' battu ri pa'bakkana ke'nanga, Kipasalamaki nyawaku battu ri anjo singa-singaya.
35:18 Nakulappala' sukkuru' mae ri Katte ri tangngana ummatTa, siagang kupuji arenTa lalang ri pa'rappunganna ke'nanga.
35:19 TeaKi' balang parekangia' nipare' karek-karenang ri tau ambalianga' natena saba'na. TeaKi' balang parekangia' nigorai ri tau birisika ri nakke natena saba'na.
35:20 Tasomberai bicaranna ke'nanga; a'rancanai ke'nanga ero' annipu mae ri tau siamaka lalang tallasa'na.
35:21 Ammarrang-marrangi ke'nanga mae ri nakke angkana nacini'mi ke'nanga apa le'baka kugaukang.
35:22 Mingka iKatte, O, Batara, le'ba' anciniki; teaKi' a'mereki, o, Batara, teaKi' bellai battu ri nakke.
35:23 Ammenteng maKi' naKipattojenga' ri parkaraku, o, Allata'alaku siagang Bataraku, Kitulung laloa'!
35:24 Pattojenga', saba' adelekKi', o, Batara Allata'alaku, teaKi' lappassangngi musua anggoraia'.
35:25 TeaKi' lappassangngi ke'nanga angkana ri pa'mai'na, "Sukkuru' maki', kale'ba'mi nipattaena nyawana. A'jarimi pattujunta!"
35:26 Boli'mi kamma tau sannanga anciniki pa'risikku a'jari lingu siagang a'jari siri'-siri'. Boli'mi kamma tau napattampoanga kalenna mae ri nakke nihina siagang nipakasiri'.
35:27 Poro tu eroka ancinikka' nipattojeng akkio' rannu siagang ma'reja-reja. Poro a'mole-molei ke'nanga angkana, "Malompo tojenna Batara! Nakaerokangi kasalamakkanna atanNa!"
35:28 Na lakukabarrang kaadelanTa, siagang kumammuji ri Katte sila'busu' allo.