Pammuji 39

39:1 Untu' pamimping pakelong. Pammujina Daud. Untu' Yedutun.
39:2 Nakana nawa-nawangku, "Eroki kujagai kalengku sollanna tena kudoraka lanri lilaku. Taeroka' a'bicara lalang a'reppese'na ija tau ja'dalaka."
39:3 A'mereki tojenga' naung, sa'genna kupa'rugi kalengku napila' katambang pa'risikku kusa'ring;
39:4 niaccekanga' ri kalussakkang sanna' dudua. Pila' kunawa-nawai, pila' susai pa'maikku; kala'busanna kukanamo,
39:5 "O, Batara, Kipauanga' ringngapanna wattu a'jalakku sollanna kuasseng antekamma bodona tallasakku."
39:6 Antekamma bodona umurukku Kipattantua! Untu' iKatte tena siapa la'buna tallasakku. Tojeng, rupataua sanrapanji sipa'maikang nappasa' bawang,
39:7 tallasa'na allalo kammaji bayang-bayang bawang. Sikontu resona sia-siaji bawang; appatambungi barang-barang, mingka tanaassengai angkana inai lampakei.
39:8 Anne kamma apa kutayang, o, Batara? Ri Kattemi panrannuangku.
39:9 Kilappassang laloa' battu ri sikontu dosaku, TeaKi' balang parekangia' nicau-cau ri tau dongoka.
39:10 A'merekia' siagang tena nakusungke bawaku, saba' iKatte angngajarakka'.
39:11 Kialle laloi hukkunganTa battu ri kalengku, saba' a'birimma' mate napakamma pannunrunTa.
39:12 Lanri kasalanna rupataua, Kihukkungi siagang Kiajaraki sanrapang bu'bu' Kiancuruki apa lompoa anggaranna mae ri ke'nanga. Tojeng, rupataua sanrapanji sipa'maikang nappasa' bawang.
39:13 Kipilangngeri pappala' doangku, o, Batara, Kiparhatikangi pappalakku; teaKi' ammantangngi a'mereki punna angngarruka'. Sangkamma sikontu boe-boeku, sinampe'ja' bawang annumpang ri Katte.
39:14 TeaKi' gangguia', sollangku sannang sike'de', ri tenanapa ku'lampa na kutaenamo.