Pammuji 57

57:1 Untu' pamimping pakelong. Situru' lagu: TeaKi' papossoki. Pammujina Daud, ri wattunna lari antama' ri kali'bong batua alliliangi Saul.
57:2 Kikamaseang laloa', o, Allata'ala, Kikamaseanga', saba' iKattemi pa'la'langangku. Lalang pa'la'langanna ka'nyitTa kupaccokkoi, sa'genna ammari a'jallo' angnging lompoa.
57:3 Akkioka' mae ri Allata'ala Kaminang Tinggia, mae ri Allata'ala angngallea tindakang untu' kalengku.
57:4 Appiali battu ri suruga siagang Napasalamaka'; Nabetai sikamma tau anjallakkangia'. LaNapicinikianga' Allata'ala angkanaya tamamminrayai mae ri nakke, siagang tuli mangngamaseangi mae ri nakke.
57:5 Nikulilingia' ri musu, sanrapangi ke'nanga singa pakanre tau. Giginna ke'nanga sanrapangi poke siagang ana' pana, lilana ke'nanga sanrapangi pa'dang tarang.
57:6 O, Allata'ala, Kipappicinikangi kalompoanTa ri langi', siagang kala'biranTa ri sikontu linoa.
57:7 Natannangngia' sikko' musungku, natepoki sumangakku. Angngekei kali'bong ri oloangku, mingka kalenna ke'nanga tu'guru' antama'.
57:8 Kujarreki tappakku, o, Allata'ala, kujarreki tappakku, erokka' akkelong siagang ampujiKi'.
57:9 He, ambangungko, nyawaku! He, ambangungko gambusuka siagang kacapia! Erokka' ampabangungi bari'basaka.
57:10 O, Batara, erokka' appala' sukkuru' mae ri Katte ri alla'na bansa-bansaya. Erokka' akkelong lagu pammuji mae ri Katte ri alla'na umma' rupataua.
57:11 Saba' lompona pangngamaseanTa sa'genna langi', tamamminraTa sa'genna rammanga.
57:12 O, Allata'ala, Kipappicinikangi kalompoanTa ri langi', siagang kala'biranTa ri sikontu linoa.