Pammuji 58

58:1 Untu' pamimping pakelong. Situru' lagu: TeaKi' papossoki. Pammujina Daud.
58:2 He, sikamma tukoasaya, apaka adeleki kaputusannu? Apaka lambusukko ri wattunna nuadeli rupataua?
58:3 Tena, ikau apa ja'dala' nurancana ngaseng, siagang katerassang nugaukang ri anne pa'rasanganga.
58:4 Tau ja'dalaka lingu memammi baku' lalanna ri battang annipu memammi ke'nanga baku' nilassukanna.
58:5 Nia' racunna ke'nanga sanrapang racunna ularaka, natongkoki tolinna ke'nanga sanrapang ulara' le'leng tongolo'
58:6 tenaya nalangngereki sa'ranna tumangngajara' cara'de'na, yareka sa'ranna sanro cara'deka.
58:7 O, Allata'ala, Kitepo' laloi gigi-giginna ke'nanga, Kibi'bu' laloi gigi ri dallekanna anjo singa rungkaya, o, Batara.
58:8 Boli'mi kamma lanynya' ke'nanga sanrapang je'ne' a'rumbua, sanrapang ana' pana pokkolokamo.
58:9 Boli'mi kamma ke'nanga sangkamma biku assolonga sangkamma urusu', sangkamma ana' lolo matea ri tenanapa naccini' singara'.
58:10 Ri tenanapa nangngu'rangi, naposso'mo ke'nanga, sanrapang rompo' moncongbulo iji na tenapa nalompo mingka la'busu'mi niri'bakang ri anging, sanrapang lamung-lamung kalotoro'.
58:11 Rannui tau lambusuka anciniki tau ja'dalaka nihukkung, na nabissai bangkenna lalang cera'na tau dorakaya.
58:12 Lanakanamo taua, "Tau bajika anggappai pahala, tojeng, nia' Allata'ala angngadeli ri lino."