Pammuji 61

61:1 Untu' pamimpin pakelong. Nirurungang ri kacapi. Battu ri Daud.
61:2 Kipilangngeri pakkiokku, o, Allata'ala, parhatikangi pappala' doangku.
61:3 Bella battu ri balla' kumakkio' mae ri Katte, lanri tappu' minasama'. IKatte langngantaraka' ri tampa' palariang amanga, tampa' sannaka tinggina untu' inakke;
61:4 saba' iKattemi pa'la'langangku, tampa' attahang kassakku mae ri musungku.
61:5 Boli'mi kamma kunnumpang ri kemaTa lalang sikontu umurukku, sollangku amang lalang ri la'lanna ka'nyitTa.
61:6 Saba' Kilangngere'mi janjingku, o, Allata'ala, assareai barang pisaka tau mappilangngeria.
61:7 Poro la'bu lalo umuru'na karaenga, sa'genna attallasa' a'bija-bija.
61:8 Poro ammarentai satunggu-tungguna salaku karaeng nipileTa, o, Allata'ala, Kijagai siagang pangngamaseanTa na tamamminraTa.
61:9 Nakutuli lamakkelong mammuji mae ri Katte, mange-mange allo kurupai janjingku.