Pammuji 63

63:1 Pammujina Daud, ri wattunna nia' ri parang lompona Yehuda.
63:2 O, Allata'ala, iKattemi Allata'alaku, nakkuka' ri Katte na kuboyaKi', Sanrapang butta kalotoro' nakku' ri je'ne', kammaminjo nakkukku mae ri Katte.
63:3 Boli'mi kamma kuccini' mae ri Katte ri BallatTa, siagang kucini' kagassinganTa siagang kalompoanTa.
63:4 Lompoangangi anggaranna pangngamaseanTa na tallasaka, lanri kammana minjo kummuji ri Katte.
63:5 Lalang sikontu umurukku appala' sukkurukka' mae ri Katte; kuangkaki limangku kuppala' doang ri Katte.
63:6 KupujiKi' siagang akkio' rannu ri Katte, saba' Kipassukkuki pakkasia'na nyawaku sangkamma kanre nyamang dudua.
63:7 Ri wattu anra'baku ri tampa' katinroangku, kumangngu'rangi ri Katte; sila'busu' bangngia' annawa-nawaKi',
63:8 saba' iKattemi le'ba' antulunga'; akkelong rannua' lalang la'lanna ka'nyitTa.
63:9 Kuta'gala' majarrekKi', limanTa antumpaka'.
63:10 Mingka sikamma tau eroka ambunoa' lanaungi ri linona tau matea.
63:11 Lamatei ke'nanga lalang pa'bundukang, siagang la'jari kanrenai olo'-olo' pakanre dagenga.
63:12 Larannui karaenga lanri pannulunNa Allata'ala; tau assumpaya lanri Allata'ala la'rannu-rannu pa'maiki, mingka bawa paballe-ballea lanijempangi.