Pammuji 65

65:1 Untu' pamimping pakelong. Pammujina Daud. Kelong.
65:2 Siratangi ikambe mammuji ri Katte ri Sion, o, Allata'ala, na narupai janjinna ikambe mae ri Katte.
65:3 Saba' iKatte ampilangngeri pappala' doanga; battu ngasengi taua mae ri Katte lanri dorakanamo.
65:4 Teai sipato' battala'na dosa-dosaku, mingka iKatte ampammopporanga'.
65:5 Mate'nei tau Kipilea, siagang tau Kikioka untu' ammantang ri BallatTa. Lanipassukkuki ikambe ri sikamma apa baji' ri BallatTa, ri pammantangngang matangkasatTa.
65:6 Kipiali ikambe iamintu Kisarei ikambe pammetang, Kigaukangi apa-apa appakalannasaka untu' ampasalamaki ikambe! IKattemi panrannuanna sikontu bansaya sa'genna mange ri tamparang bellaya.
65:7 Lanri kagassinganTa nakipaenteng sikamma monconga, untu' ampappicinikangi koasa malompoTa.
65:8 Kipakasannangi arrunna tamparanga siagang jallo'na bombanga, na Kipakasannang kagegeranna bansa-bansaya.
65:9 Sikontu pandudu'na linoa mallaki siagang appakalompoi anciniki sikamma gau' heba' Kigaukanga. Sikontu linoa battu ri cappa' se'rea mange ri cappa' maraenga Kipa'jari rannu ma'reja-reja.
65:10 Anjo buttaya Kiparakai siagang Kisarei bosi, Kipa'jari coppongi sa'genna alla'bi-la'bi wassele'na. Kibonei sikamma binangaya sa'genna rassi je'ne', Kipasadiangi ke'nanga gandung, iye', kammaminjo bateTa ampasadiangi.
65:11 Kipalo'lori je'ne' bate pa'jekona Kibasai pa'gompoang-pa'gompoang buttana. Kipa'jari coppongi buttaya siagang bosi, nampa Kitanggongi copponna sikamma cu'la' lamung-lamunna.
65:12 Lanri kabajikanTa, taung-taungi Kipasadia kattoanga; kemaeKi' battu, anjorengi kala'bianga.
65:13 Parang lompoa rassi bembe siagang gimbala', sikontu bulu'na ma'rannu-rannui.
65:14 Sikamma parang rukuka nikalimbuki ri gimbala', sikamma ka'bunna rassi gandung. Sikontuna marannui siagang mammuji ma'reja-reja.