Pammuji 67

67:1 Untu' pamimping pakelong. Nirurungangi ri kacapi. Pammuji.
67:2 Poro Nakamaseang laloki' siagang Nabarakkaki laloki' Allata'ala, poro lammoro' pa'maiki anciniki ngasengki'.
67:3 O, Allata'ala, poro naasseng laloi erotTa sikontu linoa, siagang nipa'nyata kasalamakkanTa ri sikontu bansaya.
67:4 Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.
67:5 Poro akkio' rannu ngasengi sikontu bansaya, nakkelong a'rannu-rannu. Saba' iKatte ammarenta siagang adele' na Kirurungang massing-massing bansaya ri lino.
67:6 Poro mammuji bansa-bansaya mae ri Katte, o, Allata'ala, poro appala' sukkuru' ngasengi sikontu bansaya mae ri Katte.
67:7 Angngerammi wassele' buttaya, Allata'ala, le'ba' maki' Nabarakkaki Allata'alata.
67:8 Le'ba' maki' Nabarakkaki Allata'ala; poro nipakalompoi ri sikontu linoa!