Pammuji 76

76:1 Untu' pamimping pakelong. Nirurungang ri kacapi. Pammujina Asaf. Kelong-kelong.
76:2 Alla'bangi niasseng Allata'ala ri Yehuda; masahoroki arenNa ri Israel.
76:3 Yerusalem tampa' pammantanganNa; Bulu' Sion tampa' empoanNa.
76:4 Anjorengi Naancuru' sikontu pakkakasa' pa'bundukanga, sikontu pana accillaka, pa'lapa' barambang siagang pa'dang.
76:5 Tamaka malompoTa siagang accayaTa, la'bi namoncong-moncong marioloa.
76:6 Sikamma tubarania nialleammi apa-apanna; tattappasa'mi naung talambangunga pole. Sikamma surudadu porena tappela' ngasemmi kagassinganna.
76:7 Sikontu jaranga siagang tuma'baena tu'guru' ngasemmi na mate ri pangga'garatTa, o, Allata'alana Yakub!
76:8 Tamaka hebatTa iKatte! Punna larroKi' maka inai akkulle attahang?
76:9 Battu ri langika Kipa'nyata kaputusanTa; mallaki linoa na'mereki.
76:10 Ri wattunTa ammenteng ero' angngadeli untu' ampasalamaki tau nijallakkanga ri lino.
76:11 Manna tau sannaka palla'na mammuji todong ri Katte, siagang tau larroaija ammake kaeng karung tanra susana.
76:12 Rupaimi janjinnu mae ri Karaeng Allata'alanu. Sikamma bansa a'reppeseka ammantang siratangi angngerang passare mae ri Allata'ala nikamallakkanga.
76:13 Natepoki sumanga'na sikamma tukoasaya; malla' ngasengi sikamma karaenga mae ri Ia.