Pammuji 8

8:1 Untu' pamimping pakelong. Situru' lagu Gitit. Pammujina Daud.
8:2 O, Batara, Allata'alana ikambe, masahoroki koasaTa ri sikontu linoa! KalompoanTa natompoki langika
8:3 nikelongang ri ana'-ana' siagang ana' loloa. Majarreki pamarentahanTa tamakkulle nilengga untu' antongkoki bawana musua siagang balia.
8:4 Punna kuciniki langi' le'baka Kipa'jari, bulanga siagang bintoeng le'baka Kitannang,
8:5 apa todong rupataua, nasiratang laKiu'rangi, inai todong ke'nanga, nasiratang Kiparakai?
8:6 Mingka Kiangka'mi ke'nanga la'biring sinrapang Allata'ala, Kipipakei kalompoang siagang kala'birang.
8:7 Kisarei koasa ri sikontu linoa, Kipadundui sikontu bate paretTa mae ri ia:
8:8 gimbala', sapi, na yangasenna olo'-oloka, kammayatompa olo'-olo' niaka ri parang lompoa;
8:9 jangang-jangang siagang sikamma jukuka, sikontu apa attallasaka lalang tamparang.
8:10 O, Batara, Batarana ikambe, masahoroki kalompoanTa ri sikontu linoa!