Pammuji 84

84:1 Untu' pamimping pakelong. Situru' lagu: Gitit. Pammujina golongang Korah.
84:2 Tamaka appakasannanna tampa' pammantanganTa, o, Allata'ala Kaminang Koasaya!
84:3 Tamaka nakku'na pa'maikku ri BallatTa, akkio' rannui nyawaku siagang batangkalengku mae ri Allata'ala mattallasaka.
84:4 Ba'lalo manna cui-cuia anggappa todong balla' jangang-jangang ri allaka anggappa ru'mung, tampa' pammolikang ana'na ri ampi' tampa' pakkoro'bangnganTa, o, Batara Kaminang Koasa, Karaengku siagang Allata'alaku.
84:5 Tamaka mate'nena tau ammantanga ri BallatTa, na tuli makkelong lagu pammuji mae ri Katte.
84:6 Mate'nei tau anggappaya kagassingang battu ri Katte, eroka mange assiara ri Bulu' Sion.
84:7 Lalang a'jappana ke'nanga numalo ri Ka'bung Baka, napinrai anjo tampaka a'jari timbuseng je'ne', uru bosia angngerang barakka' alla'bi-la'bi.
84:8 Pila' katambang kagassinganna ke'nanga, wattu a'jappana mange ri Sion, mange ri tampa' Allata'alana sikontu rewataya ampappicinikangi kalenna.
84:9 Kipilangngeri laloi pappala' doangku, o, Karaeng Allata'ala Kaminang Koasaya, Kipilangngeri laloi, o, Allata'alana Yakub.
84:10 Kibarakkaki karaenna ikambe, o, Allata'ala, Kijagai laloi tau le'baka Kipile.
84:11 Bajikangngangi sialloa ri BallatTa nasisa'bu allo ri tampa' maraenga. Kualleangangi a'jaria pajaga ri pakke'bu' lompona Balla'Na Allata'alaku naia ammantanga ri balla' tau ja'dalaka.
84:12 Saba' Karaeng Allata'ala pa'la'langanta siagang Karaeng Malompo, assidakkiaki' pangngamaseang siagang kalompoang. Tale'bakai Natolla' apa bajika mae ri tau tenaya callanna ri tallasa'na.
84:13 O, Batara Kaminang Koasaya, mate'nei tau tappaka mae ri Katte.