Pammuji 85

85:1 Untu' pamimping pakelong. Pammujina golongang Korah.
85:2 MangngellaiKi' mae ri buttaTa, o, Batara, lampa-lampana Israel le'ba'mi Kipakabaji'.
85:3 Le'ba'mi Kipammopporang dosa-dosana ummatTa; Kikaluppai sikontu kasalanna.
85:4 Tenamo naKikalarroi ke'nanga; taKipa'jariami pangngalarroi lompoTa.
85:5 Kipakabajiki ammotere' ikambe, o, Allata'ala Tumappasalama'na ikambe, tea' maKi' kalarroi pole ikambe.
85:6 Untu' satunggunaka Kikalarroi ikambe? Tuli lalarroKi' mae ri turunganna ikambe?
85:7 Pakajarreki ikambe ammotere' sollanna rannu ummatTa lanri pannulunTa.
85:8 Kipa'nyatai angkana tuli mangngamaseangKi', o Batara, Kisare laloi kasalamakkang ikambe.
85:9 Erokka' ampilangngeri kananNa Karaeng Allata'ala; Napa'janjiangi kasalewanganga mae ri katte, umma'Na, assala' tenaja nigaukang poleangi dosaya.
85:10 Tojeng, sadiai lampasalamaki tau mappilangngeria, Allata'ala malompoa lammantangi ri pa'rasanganta.
85:11 Lasigappai pangngamaseanga siagang nyawa tamamminraya, lasirakaki kaadelanga siagang passiamakkanga.
85:12 Lattimboi battu ri butta nyawa tamamminrana rupataua, lattoaki kaadelanNa Allata'ala battu ri langi'.
85:13 Napassareangi Batara bajika, nalangngerang wassele' buttata.
85:14 A'jappai ri dallekanNa Batara kaadelanga, napasadiang oloang Bataraya.