Pammuji 89

89:1 Kelong pangngajara' battu ri Etan, tu Ezrahi.
89:2 PangngarimangnginTa, o, Batara, latuli kukelongang, tamamminraTa lakukabarrang mae ri sikontu turungang.
89:3 Saba' kuassengi angkana satunggu-tungguna pangngamaseanTa, majarreki tamamminraTa sanrapang langi'.
89:4 Kikana, "Le'bakKa' appare' parjanjiang siagang tu nipileKu; le'bakKa' assumpa mae ri Daud, atangKu:
89:5 'Empoang kala'birannu laKupartahangkangi satunggu-tungguna, laniempoi ri ana' cucunna.' "
89:6 Passirapakkanga ri suruga mammuji ri gau'-gau' mappakalannasatTa, na nakelongang tamamminraTa, o, Batara.
89:7 Ri langi' tena sangkammanTa o, Batara, tena apa ri suruga ampasangkammaiKi'.
89:8 NipakalompoKi' ri sikamma tau matangkasaka, nikamallakkangKi' la'biangngang nasikontu niaka ri tammuliliTa.
89:9 O, Batara, Allata'ala Kaminang Koasaya, inaika sangkammanna gassinTa? MajarreKi' lalang sikontu-kontuna, o, Batara.
89:10 IKatte makoasa ri tamparang lompoa bombanna, ampakasannangi bombang lompoa.
89:11 Rahab, naga tamparang, Kilicaki siagang Kibunoi, Kibetai sikontu musunTa siagang lima magassinTa.
89:12 IKatte pata langika siagang buttaya, bate paretTa linoa siagang sikontu bonena.
89:13 IKatte ampa'jari waraka siagang timboroka, makkio' rannui mae ri Katte Moncong Tabor siagang Hermon.
89:14 Tamaka lompona koasaTa, tamaka heba'na kagassinganTa!
89:15 Dasara'na kakaraenganTa iamintu kaadelang siagang hukkung, pangngamaseanTa siagang tamamminraTa a'nyatai lalang sikontu tindakanTa.
89:16 Mate'nei bansa rannua anggaukangi ibadana, attalasaka lalang ri cayana kahaderanTa, o, Batara.
89:17 Sila'busu' allo rannu ke'nanga siagang tuli majarre', lanri kabajikanTa.
89:18 Kisarei ikambe pammetang lompo, lanri kabajikanTaji bawang nammeta ikambe.
89:19 Saba' tuma'jagana ikambe iamintu tunipileTa, o, Batara; karaenna ikambe iamintu Allata'ala Matangkasa'na Israel pata.
89:20 Riolo dudu lalang se're so'na, Kikana mae ri ata tamamminraTa, "Le'baki Kutulung se'rea tubarani, se'rea tule'ba' Kupile battu ri ra'ya', Kupakatinggimi.
89:21 Kubuntulu'mi Daud, atangKu, nampa Kulanti' siagang minynya'-minynya' upacara.
89:22 Tuli lanijagai ri kagassingang battua ri Nakke, koasaKu lampakagassingi.
89:23 Talanibetayai ri musu, siagang talanijallakkangai ri tu ja'dala'.
89:24 Sikontu musunna laKuballassi, inai-nai angkabirisi Kubunoi.
89:25 Latuli Kukamaseangi siagang talamamminrayA' mae ri ia, siagang laKupa'jari pila' makoasai.
89:26 LaKupa'la'baki kakaraenganna, battu ri Tamparang Tangngaya sa'genna Binanga Efrat.
89:27 Lanakana ri Nakke, 'IKattemi Manggeku, Allata'alaku, Pa'la'langangku siagang Tumappasalamakku.'
89:28 Ia laKupa'jari ana' bura'ne toaKu, kaminang malompoa ri sikontu karaenga.
89:29 Latuli Kukamaseangi satunggu-tungguna, parjanjiangKu siagang ia tuli majarre'na.
89:30 Kupartahangkangi empoang kala'biranna lalang nia'na ija langika irateanna buttaya, lanaempoi sikontu ana' cucunna.
89:31 Mingka punna nadakkai turunganna hukkungKu, natena nattallasa' situru' parentaKu,
89:32 punna tena najampangi apa le'baka Kupattantu siagang nabalang parekang paratorangKu,
89:33 laKuhukkungi ke'nanga paccambo' lanri tamannurukinna, laKupitujui bala ke'nanga lanri dosa-dosana.
89:34 Mingka tuli laKukamaseanna Daud, talaKukaluppaiyai nyawa tamamminraKu.
89:35 Tena Kukaluppai parjanjiangKu siagang ke'nanga, manna se're janjingKu talania' Kukaluppai.
89:36 SikalijA' assumpa untu' satunggu-tungguna lanri areng matangkasakKu; tena Kula'balle-balle mae ri Daud.
89:37 Lattahangi empoang kala'biranna lalang nia'naija mataalloa, lanaempoi sikontu ana' cucunna.
89:38 Tuli lania'na kakaraenganna sanrapang bulang, iami sa'bi tamamminra rate ri rammanga."
89:39 Mingka anne kamma larroKi' mae ri karaenga, Kipelaki siagang Kitollaki tu nipileTa.
89:40 Kikaluppai parjanjianTa siagang atanTa, Kipasambilai empoang kala'biranna antama ri cammaraka.
89:41 Kirumbangi tembo'-tembo' kalli' kotaya, tampa'-tampa' pattahanganna Kipa'jari rumbangang.
89:42 Sikontu tau allaloa anrampasaki apa-apanna, a'jari tunicau-caui ri bansa-bansa siampi'na.
89:43 Kisarei pammetang musu-musunna, Kipa'jari rannu ngasengi sikontu balinna.
89:44 Ba'lalo Kipa'jari tena matu-matunna sanjatana, tena Kitulungi lalang pa'bundukang.
89:45 Kipa'lebaki koasa accayana, Kipatappasaki naung ri butta empoang kakaraenganna.
89:46 Kipakabodoi umuru' rungkana, nampa Kitongko' kalenna siagang siri'.
89:47 Sa'genna siapa salloTa laccokko, o, Batara? Sa'genna siapa sallona la'rinra kamma pepe' kalarroanTa?
89:48 Kiu'rangi laloi antekamma bodona anne tallasakku, Kipa'jari rupataua a'jari tau lamate.
89:49 Inaika lakkulle tallasa' tuli siagang talamatea? Inaika akkulle alliliangi kuburuka?
89:50 O, Batara, kemaeji tanra pangngamaseanTa riolo, Kipa'janjianga mae ri Daud lanri tamamminraTa?
89:51 Kiu'rangi o, Batara, antekamma batena nicalla anne atanTa, kukasiaki nihinaya ri jai bansa.
89:52 Musu-musunTa nahinai karaeng nipileTa, o, Batara, manna kemae lampana tuli nacau-caui.
89:53 Pujimi Batara sa'genna satunggu-tungguna. Jari lalomi kammaya anjo! Aming!