Pammuji 91

91:1 Sikamma tau a'la'langa mae ri Kaminang Tinggia, ammantanga lalang ri pa'la'langanNa Kaminang Koasaya,
91:2 akkullei angkana ri Batara, "IKattemi Tumappatojengku siagang pa'la'langangku, Allata'alaku, iKattemi kupatappa'."
91:3 LaNalappassangko battu ri bahaya taccokkoa, siagang battu ri garring angngeranga kamateang.
91:4 LaNatongkokko siagang ka'nyi'Na, sa'gennu amang lalang ri la'lanNa; nyawa tamamminraNa sanrapangi pa'lapa' ri batangkalennu anjagaiko.
91:5 Tea' mako mallakki ri bahaya wattu bangngia, yareka pa'bakka ti'ring battua ri wattu allo;
91:6 ri bala battua ri wattu sassanga, yareka kaancurang antujuako ri tangngana alloa.
91:7 Manna 1.000 tau mate ri sa'rinnu, na 10.000 ri sa'ri kanannu, mingka ikau tena nungngapa-apa.
91:8 Punna accinikko mae ri tammulilinu, nuciniki tau ja'dalaka anggappa pa'balasa'.
91:9 Saba' Batara nupa'jari Tumappasalama'nu, Kaminang Tinggia nupa'jari pa'la'langannu.
91:10 Natalanatabayako bala, balla'nu talanitujuai ri bala lompo.
91:11 Nasuroi Allata'ala malaeka'Na anjagaiko, untu' alla'langngiko manna kemae lampanu.
91:12 Lanaangkakko ke'nanga lalang pala' limanna, sollanna tena nata'runtu' bangkennu ri batua.
91:13 Lanudakkai ularaka siagang singaya, langngonjokko singa rungka siagang ulara' a'racung.
91:14 Nakana Batara, "LaKupasalamaki tau mangngaia mae ri Nakke, laKupasalamaki tau angngakuiA'.
91:15 Punna akkio' mae ri Nakke, laKupiali. Ri wattu kasukkarang, laKutulungi; laKulappassangi na Kusare kalompoang.
91:16 LaKupassukkuki pa'mai'na naKupakala'bu umuru'na, siagang Kupasalamaki."