Pammuji 92

92:1 Kelong untu' allo Pammari-mariang.
92:2 Tamaka baji'na appala' sukkuruka mae ri Katte, o, Batara, siagang mammuji ri Katte, Allata'ala Kaminang Tinggia;
92:3 angkabarrangi pangngamaseanTa ri wattu bari'basa', siagang nyawa tamamminraTa ri wattu bangngi,
92:4 angngo'bi' gitar sampuloa otere'na, nirurungang ri gambusu' siagang kacapi.
92:5 Saba' panggaukanTa napakarannui pa'maikku, makkelong rannua' lanri bate paretTa.
92:6 Tamaka lompona sikamma panggaukanTa, o, Batara, tamaka lantanna sikamma pikkiranTa!
92:7 Tau dongoka takkulleai napahang, tau toloa takkulleai napahang.
92:8 Nakulle kapang tau dorakaya coppongi sanrapang ruku'; tau ja'dalaka pila' kalumanynyangi na kala'biang; mingka laniballassi taba sikali ke'nanga,
92:9 saba' iKatte, o Batara, koasaKi' satunggu-tungguna.
92:10 Naassengi ikambe angkana lanipaccappuki musunTa, o, Batara, lanipasimbungi sikontu tau ja'dalaka.
92:11 Kipa'jari kassaka' sanrapang tedong romang liaraka, na Kibarakkakia' siagang kate'neang.
92:12 Kuciniki nibetana musu-musungku, sikamma tau ammentenga untu' ambalianga', kulangngere'mi rancana-rancana ja'dala'na ke'nanga.
92:13 Tau lambusuka accu'laki sanrapang poko' koro'ma, coppong timbona sanrapang poko' camara Libanon.
92:14 Sanrapangi ke'nanga poko' nilamunga ri Balla'Na Batara, a'bakkaka ri Balla'Na Allata'alata,
92:15 poko' tuli a'rappoa ri wattu toanamo, tuli moncongbulona siagang copponna.
92:16 Iaminjo tanranna angkana adeleki Batara; Iami angngalleia', tena kajekkongang ri KalenNa.