Pammuji 96

96:1 Akkelongko lagu beru mae ri Batara! Akkelongko mae ri Batara, he sikontu linoa!
96:2 Akkelongko mae ri Batara siagang Ia nupuji; allo-allona pa'la'bangi kabara' nikarannuanga angkanaya le'ba' maki' Napasalama'.
96:3 Caritai kalompoanNa mae ri bansa-bansaya, siagang panggaukang-panggaukang poreNa mae ri umma' rupataua.
96:4 Saba' malompoi Batara, siagang sanna' nipujiNa, musti nikamallakkangi la'biangngang nasikontu rewataya.
96:5 Sikontu rewatana bansa maraenga poro patung barhalaji bawang, mingka Batara, Iami ampareki sikontu apa niaka.
96:6 Nikalimbuki ri kalompoang siagang kala'birang, Balla'Na rassi kakoasang siagang kaga'gang.
96:7 Pujimi Batara, he umma' rupataua, pujimi kalompoanNa siagang kagassinganNa!
96:8 Pujimi arenNa mala'birika, siagang angngerangko koro'bang antama' ri Balla'Na.
96:9 Ammakeko pakeang ibada na nusomba Batara! Annekere' mako ri dallekanNa, he sikontu linoa!
96:10 Kabarrangi mange ri bansa-bansaya angkana, "Anjo Batara Karaeng! Jarreki linoa takkulleai ta'lengga; Iami langngadeli bansa-bansaya siagang adele'."
96:11 Rannu mako, he langika siagang buttaya! Ammarrung mako, he tamparanga siagang sikontu bonena!
96:12 Rannu mako, he paranga siagang sikontu lamung-lamunna! Akkio' rannuko sikamma poko'-pokoka ri romanga.
96:13 Saba' Batara battu ammarenta ri lino, laNaadeli bansa-bansaya siagang adele' na lambusu'.