Pammuji 97

97:1 Batarami Karaeng! Poro rannumi linoa, na ma'reja-reja pulo-puloa.
97:2 Nikulilingi ri rammang siagang kasassangang; dasara'na pamarentahanNa iamintu kaadelang siagang hukkung.
97:3 A'la'baki pepeka ri dallekanNa, Napakamutungi musu niaka akkuliling.
97:4 Kila'Na assingari linoa, annekkereki buttaya anciniki.
97:5 Assolongi sikamma monconga sanrapang liling ri dallekanNa Batara, ri dallekanNa Batara, sikontu makoasaya ri sikontu linoa.
97:6 Langi' angkabarrangi kaadelanNa, na sikontu bansaya anciniki kala'biranNa.
97:7 Sikontu tau anynyombaya ri barhala lanipakasiriki, ampattampoangai barang-barang tenaya matu-matunna; sikontu rewataya lasu'juki ri dallekanNa Batara.
97:8 Sannangi pa'mai'na pandudu'na Sion siagang kota-kota Yehuda ri wattu nalangngere'na kaputusanNa Batara.
97:9 Saba' iKatte, o, Batara, makoasa ri sikontu lino; iKatte malompo la'biangang na sikontu rewataya.
97:10 He, ikau ngaseng mangngaia ri Batara, kabirisi laloi kaja'dallanga! Saba' Najagai Batara tallasa'na umma'Na, Napakabebasaki ke'nanga battu ri koasana tu dorakaya.
97:11 Ammumbami singaraka mae ri tau tulusuka pa'mai'na, siagang karannuanga mae ri tau lambusuka.
97:12 Rannu mako, he sikamma tau tulusu' pa'maika lanri apa le'baka Nagaukang Batara, siagang appala' sukkurukko mae ri Allata'ala matangkasaka.