Pangngebarang 10

10:1 Iaminne sikamma pappakainga'na Salomo: Ana' cara'deka iami nakalompoang pa'maika manggena; ana' toloa napakasusai pa'mai'na amma'na.
10:2 Kakalumanynyangngang nigappaya battu ri akkala' salaya tena nangngerang kaupakkang; kabalekanna, kalambusanga lappasalamaki.
10:3 Batara tena Nabalang parekangi tau bajika naalle cipuru'; mingka Nahalangi tau ja'dalaka sollanna tanagappaya apa nakaerokia.
10:4 Tau malasaka latu'guru' kasi-asi; tau rajenga la'jari kalumanynyangi.
10:5 Tau cara'deka appa'rappungi kattoang punna narapi' wattunna, mingka tau attinroa bawang ri wattu pakkattoanga, lanapakasiriki kalenna.
10:6 Tau bajika langgappai barakka'. Kapallakkanga taccokkoi ri bokona kana-kananna tau ja'dalaka.
10:7 Pangngu'rangia mae ri tau bajika angngerangi barakka', mingka tau ja'dalaka lintaki nikaluppai.
10:8 Tau cara'deka, nangai annarima pappasaile; tau dongoka ri bicaranna lalingui.
10:9 Tau lambusuka, amangi tallasa'na; tau annipua lakaassengangi.
10:10 Inai ancokkoi katojenganga, appaumbai kasusaang; inai akkana lambusu' ancallai kodia, angngusahai kasalewangang.
10:11 Kana-kananna tau bajika lappa'niaki tallasa' mate'ne, mingka ri bokona kana-kananna tau ja'dalaka taccokkoi pa'mai' pallaka.
10:12 Kabirissanga appaumbai pa'beserang; mangngamaseanga napammopporangi sikontu kasalanga.
10:13 Tau taranga pikkiranna, kana-kana cara'de' napasulu'; tau toloa parallui nicambo'.
10:14 Tau cara'deka appasse'rei pangngassengang; punna tau toloa a'bicara, bala nakio'.
10:15 Kakalumanynyangngang alla'langi tu kalumanynyanga, tallasa' ta'ronang-ronang angngancuruki tu kasi-asia.
10:16 Punna nigaukang bajika, pahalana iamintu tallasa' mate'ne; punna nigaukang dosaya, kale'bakkanna pila' jai dosa.
10:17 Inai anjampangi pappasailea, lasalewangangi tallasa'na, inai battala' angngakui kasalanna, niaki lalang bahaya.
10:18 Tau accokkoa kabirisang iami patipu. Tau appa'la'banga pitina iami tau dongo'.
10:19 Pila' jai bicara, pila' a'reppeseki dosaya; tau akkullea ampakalewai lilana, iami tau cara'de'.
10:20 Kana-kananna tau bajika sanrapangi pera' ti'no'; pikkiranna tau ja'dalaka tena anggaranna.
10:21 Kana-kananna tau bajika, a'jari barakkaki mae ri tau jaia; kadongokanna tao dongoka ambunoi kalenna.
10:22 Lanri barakka'Na bawang Batara na'jari kalumanynyang taua; anjama terasaka takkulleai natambai barang-baranga.
10:23 Tau dongoka nangai appanggaukang salaya; tau cara'deka nangai a'boya kacara'dekang.
10:24 Tau te'nea pa'mai'na lanagappai apa nakaerokia; tau ja'dalaka nagappai apa kaminang nakamallakkanga.
10:25 Punna battu anging lompoa antujui, lanynya'mi tau ja'dalaka; mingka tau lambusuka tuli jarreki satunggu-tungguna.
10:26 Teako assuroi tau malasa', appakabirisi'ji bawang, sanrapang cukka appatilu gigi yareka umbu appakapacce mata.
10:27 Pakalompoi Batara, nanusallo lattallasa'; tau ja'dalaka mate taria'jala'nai.
10:28 Panrannuanna tau bajika ampa'jari mate'nei; panrannuanna tau ja'dalaka tena sikali bonena.
10:29 Batara anjagai tau lambusuka, mingka Napanraki tau a'gau' ja'dalaka.
10:30 Tau te'nea pa'mai'na tallasa'na laamangi na salewangang; tau ja'dalaka talammantangai ri butta pisakaya.
10:31 Tau te'nea pa'mai'na appasuluki kana-kana cara'de'; tau ja'dalaka lanijempangangi bawana.
10:32 Kana-kana tau te'nea pa'mai'na appakasannangi nyawa; kana-kana tau ja'dalaka tuli appakapa'risiki pa'mai'.