Pangngebarang 16

16:1 Rupataua akkullei appare' rancana, mingka Allata'ala assare kaputusang.
16:2 Tunggala' panggaukanna taua nakulle kapang bajiki ri paccini' kalenna, mingka Batara angnganggaraki ero' pa'mai'na.
16:3 Pappirannuangi mae ri Batara sikontu rancananu, nanukkulle lampa'jari ri nugaukanna.
16:4 Sikontu apa Napareka Batara nia' natuju; na natujua tau ja'dalaka iamintu kapanrakang.
16:5 Sikontu tau borroa nikabirisi ri Batara; tena Nakellai ke'nanga ta'lappasa' battu ri hukkunganga.
16:6 Tau tenaya namminra nyawana mae ri Allata'ala lanipammopporangi; tau mappilangngeria lanipalili battu ri sikontu kaja'dallanga.
16:7 Punna nupakasannang pa'mai'Na Batara, musu-musunnu laNapa'jari agangi.
16:8 Bajikangngangi sike'de' panggappanga assala' battu ri kalambusang, kala jaia panggappang lanri gau' tena naadele'.
16:9 Akkullei rupataua appare' rancana, mingka Allata'ala ampattantui oloang tallasa'na.
16:10 Karaenga annarimai koasa battu ri Allata'ala, jari, tena nasala lalang kaputusanna.
16:11 Nakaerokangi Batara a'gau' lambusu' taua lalang pa'balu'-balukanga, kammayami lalang ammakea ukkurang siagang timbangang.
16:12 Mae ri tukoasaya, nikanaya a'gau' ja'dala' iami karantassang, saba' jarreki pamarentahanna lanri kaadelang.
16:13 Kasa'biang annabaya napakasannangi pa'mai'na tukoasaya, nakamaseangi tau a'bicara lambusuka.
16:14 Pangngalarroinna karaenga sanrapangi kabara' hukkungang mate; tau cara'deka usahai untu' ampanaungi larrona!
16:15 Kabajikang pa'mai'na karaenga appabattui salewangang, sanrapang rammang appaturunga bosi ri wattu timoro'.
16:16 Bella' la'bi baji'na anggappaya kacara'dekang kala anggappaya bulaeng; la'bi lompoangngangi anggaranna anggappaya pangngassengang kala anggappaya pera'.
16:17 Tau bajika napakabellai kalenna battu ri kaja'dallanga; tau amparhatikangai batena attallasa', najagai kalenna.
16:18 Kaborroanga angngerangi kapanrakang; katampoanga angngerangi karuntungang.
16:19 Bajikangngangi tuna pa'maika natena pa'barang-barangngang, kala amminawanga ri tau borroa nanikasia' barang-barang narampasaka ke'nanga.
16:20 Parhatikangi apa nipangngajarranga mae ri kau, nalanugappa apa-apa bajika. Tappakko mae ri Batara, na nulamate'ne.
16:21 Tau cara'deka niassengi nibatei battu ri pikkirang taranna; angngallei pa'mai' batena a'bicara, ampa'jari nipatappa' kana-kananna.
16:22 Kacara'dekanga iami kabattuanna mate'nena tallasa'na tau bajika akkala'na; tau toloa nisessai ri katoloang kalenna.
16:23 Pikkiranna tau bajika akkala'na ampa'jari cara'deki kana-kananna, siagang pila' nipatappaki ajaranna.
16:24 Kana-kana bajika sanrapangi je'ne' bani; te'nei kasia'na siagang napakkamalei tubua.
16:25 Nia' oloang lambusuki cinikanna, mingka kala'busanna anjo oloanga mangei ri kamateanga.
16:26 Kaparalluang untu' angnganre, iami saba' nausaha taua; lanri battanna, natarpassa anjama.
16:27 Tau ja'dalaka usahai ancilakai paranna tau; ja'dalaki kana-kananna sanrapang pepe' a'bara.
16:28 Tau jekkonga akkala'na appaumbai pa'beserang; tau nangaia ampitinai paranna tau appasisa'laki bela mabaji'.
16:29 Tau sekkeka natipui bela-belana, na naerang ke'nanga antama ri bahayaya.
16:30 Tutuko ri tau ta'muria siagang akkedo kanynyinga, nia' antu rancana ja'dala' lalang ri atinna.
16:31 Tau lambusuka lanisarei umuru' la'bu; uanna sanrapangi songko' kalompoang accaya.
16:32 Bajikangngangi tenaya nilinta' larro, kala anna'gala' koasa; bajikangngangi nilewaia kalea, kala ammeta se're kota.
16:33 Untu' angngassengi sarenna, ammuangi taua campalle', mingka ampattantuai kale'bakkanna, Bataraji bawang.