Pangngebarang 19

19:1 Bajikangngangi tu kasi-asi lambusuka ri tallasa'na, kala tau tolo nangaia a'balle-balle.
19:2 Rajeng nampa tena pangngassengang, tena nabaji'; tau akkaro-karoa lappareki kasalang.
19:3 Napakarugi kalenna rupataua lanri kadongokanna, nampa Batara nasalakang ri anjo passalaka.
19:4 Tau kalumanynyanga tuli katambangi aganna; tu kasi-asia ba'lalo nipilari ri aganna.
19:5 Tau a'balle-ballea ri pangadelanga, takkulleai naliliang hukkunganga.
19:6 Tunggala' tau usahai angngallei pa'mai'na tau malompoa; sikontuna taua eroki a'jari agang mae ri tau nangaia assare.
19:7 Tau kasi-asia nibalang parekangi ri sari'battanna, sarroangampa na ri aganna. Manna antekamma batena usaha takkulleai naalle pa'mai'na ke'nanga.
19:8 Inai angngondang pangngassengang, nakamaseangi kalenna; na inai angngu'rangi apa napappilajaria, lamate'nei.
19:9 Tau a'balle-ballea ri pangadelang mattantu lanihukkungi siagang nipanraki.
19:10 Tasiratangai tau toloa tallasa' kala'biang, na tena todong nasiratang ataya amparentai tukoasaya.
19:11 Tau cara'deka akkullei natahang larrona. Nipuji lanri tanajampangiai kasalanna taua mae ri kalenna.
19:12 Larrona karaenga sanrapangi sa'ra arrunna singaya; kabajikanna karaenga sanrapangi saliu' ambasai timbo-timboanga.
19:13 Ana' toloa akkullei napanraki manggena. Baine nangaia a'moro-moro sanrapangi je'ne' tenaya nammari-mari ammatti'.
19:14 Ballaka siagang barang-baranga akkullei nagappa battu ri manggena, mingka baine cara'deka iami passareNa Batara.
19:15 A'malasa'-malasaka akkullei napajannang tinrona taua, kale'bakkanna lanaallei cipuru' anjo lapung tau malasa'.
19:16 Tau mannurukia ri sikamma parentaNa Allata'ala lasalamaki, tau tenaya naanggaraki lamatei.
19:17 Annulung tau kasi-asi sanrapangi assare angnginrang ri Batara; Batara sallang lambalasaki.
19:18 Atoro' bajiki ana'nu lalang nia'na ija panrannuang; punna tena, sanrapang erokko ri kapanrakang.
19:19 Boli'mi kamma tau lintaka larro nakasia' kale'bakkanna. Punna nutulungi, poro nutambaiji kalarroanna.
19:20 Punna nungai appilajara' siagang allangngere' pappakainga', sallang la'jariko tau nia' kacara'dekannu.
19:21 Rupataua jai rancanana, mingka kaputusanNa bawang Batara a'jari.
19:22 Sipa' nitayanga battu ri se'rea tau iamintu tamamminrana. Bajikangngangi kasi-asia kala a'jari paballe-ballea.
19:23 Pakalompoi Batara, na nuttallasa' mate'ne; lasukkuki pakkasia'nu siagang lata'lappasakko battu ri balaya.
19:24 Nia' tau teai sipato' malasa'na; manna anynyoanga kanre mae ri bawana kuttu tonji.
19:25 Punna nihukkung tau tampoa, anggappai pappilajarang tau tenaya pangalamanna. Punna nipasaile tau bajika akkala'na, lapila' katambangi kacara'dekanna.
19:26 Ana' assessayai siagang ambongkayai tau toana, iami ana' appakasiri' siagang nicalla.
19:27 Ana', punna taeroka mako appilajara', lanukaluppai apa le'baka nupappilajari.
19:28 A'jari sa'bi balle-balle, sangkammai nibawangngang hukkunga; ambalai taua, bajiki kasia'na ri tau ja'dalaka.
19:29 Tau tolo tinggi langgaya mattantu laniba'ji.