Pangngebarang 21

21:1 Sanrapang batena Naatoro' Batara je'ne' binangaya sollanna a'lo'loro' situru' ero'Na, kammatommi anjo napimpingi pikkiranna karaenga.
21:2 Tunggala' panggaukanna taua nakanai baji' ri paccini' kalenna, mingka Batara angngassengi nakaerokia pa'mai'na.
21:3 Panggaukang adeleka siagang annabaya la'bi napakasannangi pa'mai'Na Batara, kala sikontu passarea.
21:4 Anjo tau ja'dalaka dorakai, lanri nikoasai ri katampoanna siagang kaborroanna.
21:5 Rancanana tau rajenga angngerangi kala'biang; gau' akkaro-karoa kakurangang kale'bakkanna.
21:6 Kakalumanynyangngang nigappaya siagang tena lambusu' lintaki tappela' siagang naerangi taua mae ri kuburuka.
21:7 Tau ja'dalaka taerokai mannuruki ri hukkung; nisessai ri kapallakkang kalenna.
21:8 Tau salaya, a'lekko-lekkoi oloanna; tau bajika tuli lambusuki tallasa'na.
21:9 La'bi sannangi taua ammantang ri panyingkulu'na lotenga kala assiballaka siagang baine pabesereka.
21:10 Tau ja'dalaka tuli eroki anggaukangi kaja'dallanga; manna ri nai tena pangngamaseanna.
21:11 Hukkunganna tau pacau-caua a'jari pappilajarangi mae ri tau tenaya pangalamanna. Punna nipasaile tau bajika akkala'na, lapila' katambangi kacara'dekanna.
21:12 Allata'ala Kaminang Adeleka Naassengi apa kajarianga lalang ri balla'na tau dorakaya. LaNapaloposoki ke'nanga sa'genna panra'.
21:13 Inai taeroka mappilangngeri ri kunrarenna tau kakuranganga, tena todong nalaniparhatikang punna appala' tulung.
21:14 Untu' ampanaungi larro duduna taua, a'mere'-merekiko ansarei hadia.
21:15 Punna nipajappa kaadelanga, baji'mi pakkasia'na tau bajika, mingka tau ja'dalaka tena naamang nasa'ring.
21:16 Tau tamannurukia ri bate tallasa'na tau bajika akkala'na, mattantu labattui mange ri linona tau matea.
21:17 Tau nangaia assannang-sannang latuli kakurangangi; tau nangaia a'labo-labo takkulleai a'jari kalumanynyang.
21:18 Punna nihukkung tau jaia ri Batara, teai tau bajika, mingka tau ja'dalaka anggappa kasusaang.
21:19 Bajikangngangi ammantanga ri parang luaraka, kala sipammantangnganga siagang baine nangaia a'moro-moro siagang a'larro-larro.
21:20 Tau cara'deka tuli kala'biangi siagang kalumanynyangi mingka tau toloa napa'laboangi barang-baranna.
21:21 Inai usaha sollanna nigaukang kaadelanga siagang mangngamaseanga, langgappai kasalewangang, kalompoang, siagang la'bu umuru'.
21:22 Tau cara'deka akkullei naalle kota nijagaia ri tantara barani; naruntungi pattahangngang napattoanga ke'nanga.
21:23 Sollanna nililiang kasukkaranga, parallui tutu taua ri kana-kana.
21:24 Tau borroa siagang tinggi langgaya nangai accalla siagang kurangajara'.
21:25 Lapung tau malasaka taerokai anjama; nabunoi kalenna ri kacinnanna;
21:26 sila'busu' allo iaji bawang nanawa-nawa apa nakaerokia. Kabalekanna, tau lambusuka ri tallasa'na akkullei assare alla'bi-la'bi.
21:27 Tasannangngai Batara ri passarena tau dorakaya, la'biangampa punna napassareang lanri nia'na pattujuang nicallana.
21:28 Kasa'bianna paballe-ballea tena nalanipatappa'; mingka kananna tau angngassengai lampa-lampana parkaraya, lanitarimai.
21:29 Tau lambusuka tappaki ri kalenna; tau ja'dalaka akkapala' rupai.
21:30 Tena kaporeang, tarang pikkirang, siagang kacara'dekang akkulle attahang ri dallekanNa Batara.
21:31 Manna pole nipa'langka' pa'bundukanga siagang jarang pa'bundukang, mingka ampattantuai pammetanga iamintu Batara.