Pangngebarang 31

31:1 Iaminne kana-kana napaua amma' Lemuel, karaeng Masa mae ri ana'na,
31:2 "Anakku, ana' nikamaseangku, kulassukanga lanri nipilangngerinna pappala' doangku. Apa kutadeng lakukana ri kau?
31:3 Teako pa'laboangi kagassingannu yareka nupela' bawang-bawang kakassakannu mae ri bainea. Jaimi karaeng a'jari panra' lanri baine.
31:4 U'rangi anne Lemuel! Angnginung anggoro' siagang cinna dudua ri inungang terasa', tena nasiratang mae ri pamarentaya.
31:5 Saba', punna angnginung inungang terasa' karaenga, nakaluppai hukkunga siagang tenamo najampangi ha'na tau lammaya.
31:6 Inungang terasaka iami untu' tau ta'ronanga siagang tau si'naya pa'mai'na.
31:7 Angnginungi ke'nanga untu' angkaluppai kakasi-asianna siagang kasusaanna ke'nanga.
31:8 Alleangangi ke'nanga tau tenaya nakkulle naallei kalenna. Jagai ha'na sikontu tau tenaya pakkullena.
31:9 Appattujuangko untu' ke'nanga, siagang a'jariko haking adele'. Katutui ha'na tu kasi-asia siagang tau nijallakkanga."
31:10 Baine cara'deka sukkaraki nigappa; lompoangngangi anggaranna na intang barliang.
31:11 Tena nalakakurangang apa-apa bura'nenna, lanri napadongkoki panrannuanna mae ri ia.
31:12 Tale'bakai a'gau' kodi mae ri bura'nenna; lalang sikontu tallasa'na baji' gauki mae ri ia.
31:13 Rajengi appasse're tannungang siagang bulu gimbala', tuli sibuki anjama attannung.
31:14 Battu bellai angngerang kanre, sanrapang nagaukang kappala'-kappala' padangganga.
31:15 Ri bari'basa' dudua ambangungi appasadia kanre untu' bone balla'na, siagang untu' ambagei tugasa' palayang-palayanna.
31:16 A'boyai sipammantangang tampa', nampa naballi; angngusahai koko anggoro' battu ri wassele' panggappanna.
31:17 Napasadiai kalenna untu' anjama tojeng-tojeng.
31:18 Naassengi angkana sikontu apa nagaukanga, assawalaki; anjamai sa'genna lantang bangngia.
31:19 Naotereki bannanga siagang natannungi kaenga.
31:20 Tena nagi'gili' mae ri tau kakuranganga; baji' pa'maiki mae ri parallua nitulung.
31:21 Tena naranggasela punna battu wattu dinginga, lanri sadiai baju dinginga untu' bone balla'na.
31:22 Kalenna ampareki tappere' pa'lapara'na; pakeanna kaeng lenang sannaka ga'gana.
31:23 Masahoroki arenna bura'nenna kalase'renna pamimping kotaya.
31:24 Appareki pakeang siagang passikko' aya' nampa nabalukang ri padangganga.
31:25 Nikangalikangi siagang nipakalompoi; siagang tena naranggasela ri passala' allo lanadallekanga.
31:26 Lammai bicaranna; cara'deki kana-kananna.
31:27 Tuli rajengi anjama siagang naparhatikangi urusang lalang balla'na.
31:28 Nipakalompoi ri ana'-ana'na, siagang nipuji ri bura'nenna, angkana,
31:29 "Nia' jai baine baji', mingka ikaumi kaminang baji' battu ri yangasenna ke'nanga."
31:30 Tanja' ga'gaya takkulleai nipatappa', siagang kaga'ganga lalanynyaki; mingka baine mappilangngeria ri Batara siratangi anggappa pammuji.
31:31 Balasaki sikontu kabajikanna; iami baine siratanga nipakalompo ri kere-keremae!